jo shahr-e-wahshat mein ja basa ho wo kya sukun-o-qarar likkhe

jo shahr-e-vahshat meñ jā basā ho vo kyā sukūn-o-qarār likkhe

kise hai ye hausla ki bikhre to kirchiyoñ kā shumār likkhe

kabhī sunā.ī nahīñ kisī ko bhī dāstān-e-dil-e-darīda

bahut qarīne se zaḳhm likkhe bahut salīqe se ḳhaar likkhe

bahut suhūlat se chup ko likkhā likhā hai hasrat se guftugū ko

vo jo gumāñ the koī na likkhe yaqīñ ke pahlū hazār likkhe

rafāqatoñ ke nagar meñ dekhā akelā-pan thā muhīt har sū

talab kisī ko nahīñ kisī kī na ab koī ġham-gusār likkhe

safar hai lāzim to kyoñ ho mātam ye rā.egānī kā zikr kaisā

jo mere raste ke pech-o-ḳham the vo rahguzar kā ġhubār likkhe

kisī kahānī meñ ranj likkhā kisī ġhazal meñ hai zabt-e-girya

kabhī sañvarne kī baat kī hai kahīñ faqat iztirār likkhe

'hijāb' kahnā ye us se jā kar kisī ko terā junūñ nahīñ hai

kisī ko ujlat nahīñ hai koī sukūn se intizār likkhe

ye dil aham hai chalo ye maanā magar suno ye anā bhī kuchh hai

to ye bhī us se 'hijāb' kahnā kabhī na ḳhud be-qarār likkhe

jo shahr-e-wahshat mein ja basa ho wo kya sukun-o-qarar likkhe

kise hai ye hausla ki bikhre to kirchiyon ka shumar likkhe

kabhi sunai nahin kisi ko bhi dastan-e-dil-e-darida

bahut qarine se zaKHm likkhe bahut saliqe se KHar likkhe

bahut suhulat se chup ko likkha likha hai hasrat se guftugu ko

wo jo guman the koi na likkhe yaqin ke pahlu hazar likkhe

rafaqaton ke nagar mein dekha akela-pan tha muhit har su

talab kisi ko nahin kisi ki na ab koi gham-gusar likkhe

safar hai lazim to kyon ho matam ye raegani ka zikr kaisa

jo mere raste ke pech-o-KHam the wo rahguzar ka ghubar likkhe

kisi kahani mein ranj likkha kisi ghazal mein hai zabt-e-girya

kabhi sanwarne ki baat ki hai kahin faqat iztirar likkhe

'hijab' kahna ye us se ja kar kisi ko tera junun nahin hai

kisi ko ujlat nahin hai koi sukun se intizar likkhe

ye dil aham hai chalo ye mana magar suno ye ana bhi kuchh hai

to ye bhi us se 'hijab' kahna kabhi na KHud be-qarar likkhe