jo shaKHs tujhko farishta dikhai deta hai

jo shaḳhs tujh ko farishta dikhā.ī detā hai

vo aa.ine se Darā sā dikhā.ī detā hai

kiyā thā dafn jise farsh ke tale kal raat

vo aaj chhat se utartā dikhā.ī detā hai

tirī nigāh meñ mumkin hai kuchh aTak jaa.e

mujhe to sirf añdherā dikhā.ī detā hai

savāl zehn meñ chubhte haiñ nashtaroñ kī tarah

ye ḳhuun bhī mujhe hotā dikhā.ī detā hai

ḳhalā meñ Duub chukī hai nigāh jab merī

vo pūchhte haiñ tujhe kyā dikhā.ī detā hai

nigaltā jaatā hai chup-chāp ḳhushk jañgal use

ye āftāb to ThanDā dikhā.ī detā hai

naqāb badlo kuchh aise ki mo.ajiza ho jaa.e

hujūm varna bikhartā dikhā.ī detā hai

tumhārī yaad ke dariyā tamām suukh chale

jahāñ-tahāñ mujhe sahrā dikhā.ī detā hai

sadā.eñ gūñjtī rahtī haiñ rāt-bhar kis kī

makān vaise to suunā dikhā.ī detā hai

jo peḌ tum ne lagāyā thā mere āñgan meñ

vo is baras mujhe girtā dikhā.ī detā hai

jo shaKHs tujh ko farishta dikhai deta hai

wo aaine se Dara sa dikhai deta hai

kiya tha dafn jise farsh ke tale kal raat

wo aaj chhat se utarta dikhai deta hai

teri nigah mein mumkin hai kuchh aTak jae

mujhe to sirf andhera dikhai deta hai

sawal zehn mein chubhte hain nashtaron ki tarah

ye KHun bhi mujhe hota dikhai deta hai

KHala mein Dub chuki hai nigah jab meri

wo puchhte hain tujhe kya dikhai deta hai

nigalta jata hai chup-chap KHushk jangal use

ye aaftab to ThanDa dikhai deta hai

naqab badlo kuchh aise ki moajiza ho jae

hujum warna bikharta dikhai deta hai

tumhaari yaad ke dariya tamam sukh chale

jahan-tahan mujhe sahra dikhai deta hai

sadaen gunjti rahti hain raat-bhar kis ki

makan waise to suna dikhai deta hai

jo peD tum ne lagaya tha mere aangan mein

wo is baras mujhe girta dikhai deta hai