jo tamam umr ban kar mera hausla rahi hai

jo tamām umr ban kar mirā hausla rahī hai

vahī aaj merī ġhairat mujhe aazmā rahī hai

mirī fikr jaane mujh ko kahāñ le ke jā rahī hai

ki qadam qadam pe manzil sar-e-rāh aa rahī hai

nahīñ chhoḌtī hai mujh ko kisī moḌ par ye duniyā

maiñ ise rulā rahā huuñ ye mujhe rulā rahī hai

tū ye jāntā hai phir bhī nahīñ fikr āḳhirat kī

tirī maut rafta rafta tire paas aa rahī hai

jo ab aa ga.e ho tum to mujhe chhoḌ kar na jaanā

ki tumhāre bin ye hastī baḌī be-maza rahī hai

mirī zindagī ke mālik maiñ ye tujh se pūchhtā huuñ

mujhe kyoñ jahāñ meñ bhejā mirī kyā ḳhatā rahī hai

ye na ho ki vaqt-e-āḳhir rahe dil kī baat dil meñ

mirī jaan ab to aa jā mirī jaan jā rahī hai

jo tumheñ milā hai mansab use dā.imī na samjho

kisī ek kī hukūmat yahāñ kab sadā rahī hai

mujhe ab ye lag rahā hai vo ḳhizāñ thī Thiik 'rahbar'

ye bahār kaise kaise na.e gul khilā rahī hai

jo tamam umr ban kar mera hausla rahi hai

wahi aaj meri ghairat mujhe aazma rahi hai

meri fikr jaane mujh ko kahan le ke ja rahi hai

ki qadam qadam pe manzil sar-e-rah aa rahi hai

nahin chhoDti hai mujh ko kisi moD par ye duniya

main ise rula raha hun ye mujhe rula rahi hai

tu ye jaanta hai phir bhi nahin fikr aaKHirat ki

teri maut rafta rafta tere pas aa rahi hai

jo ab aa gae ho tum to mujhe chhoD kar na jaana

ki tumhaare bin ye hasti baDi be-maza rahi hai

meri zindagi ke malik main ye tujh se puchhta hun

mujhe kyon jahan mein bheja meri kya KHata rahi hai

ye na ho ki waqt-e-aKHir rahe dil ki baat dil mein

meri jaan ab to aa ja meri jaan ja rahi hai

jo tumhein mila hai mansab use daimi na samjho

kisi ek ki hukumat yahan kab sada rahi hai

mujhe ab ye lag raha hai wo KHizan thi Thik 'rahbar'

ye bahaar kaise kaise nae gul khila rahi hai