jo teri mahfil se zauq-e-KHam le kar aae hain

jo tirī mahfil se zauq-e-ḳhām le kar aa.e haiñ

apne sar vo ḳhud hī ik ilzām le kar aa.e haiñ

zindagī ke narm kāñdhoñ par liye phirte haiñ ham

ġham kā jo bār-e-girāñ in.aam le kar aa.e haiñ

vaqt ke nādāñ parinde zo.am-e-dānā.ī ke gird

ḳhūb-sūrat ḳhvāhishoñ ke daam le kar aa.e haiñ

ek manzar par nazar Thahre to Thahre kis tarah

ham mizāj-e-gardish-e-ayyām le kar aa.e haiñ

be-ḳhudī achchhī thī ab to āgahī kī shakl meñ

ġham hī ġham nā-vāqif-e-anjām le kar aa.e haiñ

pattharoñ ke rāste se apne shīshe ke qadam

sa.i-e-lā-hāsil kā ik paiġhām le kar aa.e haiñ

be-amal logoñ se jab pūchho to kahte haiñ kī 'shān'

ham azal se qismat-e-nākām le kar aa.e haiñ

jo teri mahfil se zauq-e-KHam le kar aae hain

apne sar wo KHud hi ek ilzam le kar aae hain

zindagi ke narm kandhon par liye phirte hain hum

gham ka jo bar-e-giran inam le kar aae hain

waqt ke nadan parinde zoam-e-danai ke gird

KHub-surat KHwahishon ke dam le kar aae hain

ek manzar par nazar Thahre to Thahre kis tarah

hum mizaj-e-gardish-e-ayyam le kar aae hain

be-KHudi achchhi thi ab to aagahi ki shakl mein

gham hi gham na-waqif-e-anjam le kar aae hain

pattharon ke raste se apne shishe ke qadam

sai-e-la-hasil ka ek paigham le kar aae hain

be-amal logon se jab puchho to kahte hain ki 'shan'

hum azal se qismat-e-nakaam le kar aae hain