jo teri shakl ko mahtab nahin kah sakte

jo tirī shakl ko mahtāb nahīñ kah sakte

vo mirī aañkh ko tālāb nahīñ kah sakte

sach meñ kamzor hai bīnā.ī hamārī lekin

ret ke zarre ko sīmāb nahīñ kah sakte

ham haiñ ausāf pe me.aar parakhne vaale

is liye kavve ko surḳhāb nahīñ kah sakte

kam se kam aap to rakh liije bharam yaarī kā

vo to dushman haiñ nā ādāb nahīñ kah sakte

tere va.adoñ kī zamānat nahīñ detā koī

thal ke sahrā ko to shādāb nahīñ kah sakte

gar tū momin hai to chehre pe kahīñ nuur bhī ho

ham kisī daaġh ko mehrāb nahīñ kah sakte

laakh mīThe hoñ tire shahr ke chashme lekin

ham tire shahr ko ḳhūshāb nahīñ kah sakte

jo teri shakl ko mahtab nahin kah sakte

wo meri aankh ko talab nahin kah sakte

sach mein kamzor hai binai hamari lekin

ret ke zarre ko simab nahin kah sakte

hum hain ausaf pe mear parakhne wale

is liye kawwe ko surKHab nahin kah sakte

kam se kam aap to rakh lije bharam yari ka

wo to dushman hain na aadab nahin kah sakte

tere wadon ki zamanat nahin deta koi

thal ke sahra ko to shadab nahin kah sakte

gar tu momin hai to chehre pe kahin nur bhi ho

hum kisi dagh ko mehrab nahin kah sakte

lakh miThe hon tere shahr ke chashme lekin

hum tere shahr ko KHushab nahin kah sakte