jo tu ho pas to dekhun bahaar aankhon se

jo tū ho paas to dekhūñ bahār āñkhoñ se

vagarna karte haiñ gul kār-e-ḳhār āñkhoñ se

kahāñ hai tū ki meñ khīñchūñ huuñ raah meñ terī

bisān-e-naqsh-e-qadam intizār āñkhoñ se

zi-bas ki ātish-e-ġham shola-zan hai siine meñ

girīñ haiñ ashk kī jāgah sharār āñkhoñ se

maiñ yaad kar dur-e-dandān-e-yār rotā huuñ

Tapakte haiñ guhar-e-āb-dār āñkhoñ se

Tuk aa ke dekh tū ai sarv-qad mirā ahvāl

ravāñ hai ġham meñ tire jūebār āñkhoñ se

chaḌhā.ūñ dasta-e-nargis mazār-e-majnūñ par

jo dekhūñ aaj maiñ rū-e-nigār āñkhoñ se

chaman meñ kal koī tujh sā parī nazar na paḌā

agarche dekhe haiñ jā kar hazār āñkhoñ se

huā hai dīda-e-'bedār' gul-fishāñ jab se

girā hai tab se ye abr-e-bahār āñkhoñ se

jo tu ho pas to dekhun bahaar aankhon se

wagarna karte hain gul kar-e-KHar aankhon se

kahan hai tu ki mein khinchun hun rah mein teri

bisan-e-naqsh-e-qadam intizar aankhon se

zi-bas ki aatish-e-gham shola-zan hai sine mein

girin hain ashk ki jagah sharar aankhon se

main yaad kar dur-e-dandan-e-yar rota hun

Tapakte hain guhar-e-ab-dar aankhon se

Tuk aa ke dekh tu ai sarw-qad mera ahwal

rawan hai gham mein tere juebar aankhon se

chaDhaun dasta-e-nargis mazar-e-majnun par

jo dekhun aaj main ru-e-nigar aankhon se

chaman mein kal koi tujh sa pari nazar na paDa

agarche dekhe hain ja kar hazar aankhon se

hua hai dida-e-'bedar' gul-fishan jab se

gira hai tab se ye abr-e-bahaar aankhon se