jo un se kaho wo yaqin jaante hain

jo un se kaho vo yaqīñ jānte haiñ

vo aise haiñ kuchh bhī nahīñ jānte haiñ

baḌe jannatī haiñ ye mai-ḳhvār zāhid

mai-e-talḳh ko añgbīñ jānte haiñ

javānī ḳhud aatī hai sau husn le kar

javāñ koī ho ham hasīñ jānte haiñ

shab-e-māh bantī hai har shab mire ghar

ye sab bāda-vash mah-jabīñ jānte haiñ

banāvaT bhī ik fan hai jo jāntā ho

tirī sādgī kuchh hamīñ jānte haiñ

nigāheñ na āñkhoñ ke ghūñghaT se nikleñ

adā.eñ ġhazab sharmgīñ jānte haiñ

tirī kam-nigāhī se ubhre haiñ fitne

tujhe ġhair chīñ-bar-jabīñ jānte haiñ

mirī jaan par raat ban ban ga.ī hai

mirā haal kuchh ham-nashīñ jānte haiñ

jo vāqif nahīñ lutf-e-tajdīd se kuchh

vo tauba kī lazzat nahīñ jānte haiñ

vo sharmīlī āñkheñ vo sharmīlī bāteñ

vo hañsnā bhī khul kar nahīñ jānte haiñ

mirī but-parastī bhī hai haq-parastī

mirā martaba ahl-e-dīñ jānte haiñ

baḌe paak tīnat baḌe saaf bātin

'riyāz' aap ko kuchh hamīñ jānte haiñ

jo un se kaho wo yaqin jaante hain

wo aise hain kuchh bhi nahin jaante hain

baDe jannati hain ye mai-KHwar zahid

mai-e-talKH ko angbin jaante hain

jawani KHud aati hai sau husn le kar

jawan koi ho hum hasin jaante hain

shab-e-mah banti hai har shab mere ghar

ye sab baada-wash mah-jabin jaante hain

banawaT bhi ek fan hai jo jaanta ho

teri sadgi kuchh hamin jaante hain

nigahen na aankhon ke ghunghaT se niklen

adaen ghazab sharmgin jaante hain

teri kam-nigahi se ubhre hain fitne

tujhe ghair chin-bar-jabin jaante hain

meri jaan par raat ban ban gai hai

mera haal kuchh ham-nashin jaante hain

jo waqif nahin lutf-e-tajdid se kuchh

wo tauba ki lazzat nahin jaante hain

wo sharmili aankhen wo sharmili baaten

wo hansna bhi khul kar nahin jaante hain

meri but-parasti bhi hai haq-parasti

mera martaba ahl-e-din jaante hain

baDe pak tinat baDe saf baatin

'riyaz' aap ko kuchh hamin jaante hain