jo zauq hai ki ho daryaft aabru-e-sharab

jo zauq hai ki ho daryāft ābrū-e-sharāb

to chashm-e-jām se ai shaiḳh dekh sū-e-sharāb

kabhī to de gul-e-dastār-e-shaiḳh bū-e-sharāb

qabā kī bel meñ yārab lage kadū-e-sharāb

vo mast haiñ jo haiñ majrūh-e-teġh-e-mauja-e-mai

jigar ke chaak pe ai gul bane subū-e-sharāb

jo āshiq-e-lab-e-be-gūn-e-yār ho farhād

to be-sutūn se bhī jaa.e shīr-e-jū-e-sharāb

vo mast haiñ ki jo tiijā pas-e-fanā hogā

hamāre phuul baneñge gul-e-kadū-e-sharāb

hamesha mai-kade meñ ḳhush-qadoñ kā majma.a hai

hazāroñ sarv lage haiñ kināre jū-e-sharāb

lagā.īñ taak ke us mast ne jo talvāreñ

dahān-e-zaḳhm-e-badan se bhī aa.ī bū-e-sharāb

Dubo diyā mujhe tūfān-e-mai ne ai saaqī

amīq-tar qadd-e-āmdam se nikle jū-e-sharāb

namāz shukr kī paḌhtā hai jaam toḌ ke shaiḳh

vazū ke vāste letā hai ābrū-e-sharāb

vo rashk-e-hūr mai-e-mushkbū kā ḳhvāhāñ hai

gul-e-bahisht hai mushtāq-e-rañg-o-bū-e-sharāb

sadā-e-qulqul-e-mīnā se ho gayā sābit

ki peT bhar ke kareñ mast guftugū-e-sharāb

ba-rañg-e-shīsha-e-mai ab kī fasl-e-bārish meñ

kareñge baiTh ke kashtī meñ sair-e-jū-e-sharāb

khulā ye shīshoñ ke jhukne se haal ai saaqī

ki sar-kashī nahīñ lāzim hai rū-ba-rū-e-sharāb

asīr-e-dām-e-alā.eq hoñ kis tarah mai-ḳhvār

ki rassiyoñ meñ nahīñ bāñdhte subū-e-sharāb

na ho jo kisht-e-amal apnī sabz ai saaqī

riyāz-e-ḳhuld se ham kaaT laa.eñ jū-e-sharāb

ilāj-e-zo.af-e-basar nūr-e-mai hai mastoñ ko

hamārī ā.ankhoñ kī chashma banegī jū-e-sharāb

patā lagā ke gayā sū-e-gulshan-e-jannat

kahāñ kahāñ nahīñ kī maiñ ne justujū-e-sharāb

kisī ne sāġhar-e-mai se guloñ ko dī tashbīh

nasīm-e-bāġh se aa.ī jo aaj bū-e-sharāb

mileñge sāġhar-o-mīnā jo ḳhālī use saaqī

kareñge dīda-o-dil apnī justujū-e-sharāb

kiyā jo mai-kashoñ ne azm-e-sair-e-ālam-e-āb

to badle toñboñ ke haath aa ga.ī kadū-e-sharāb

ḳharīd-e-jins-e-shafā.at meñ hogī kaifiyat

hamārī gāñTh meñ hai naqd-e-ābrū-e-sharāb

bahak ke jā.ūñ jo mastī meñ jānib-e-kausar

to mujh ko dast-e-subū khīñch laa.e sū-e-sharāb

ye kis ke aane se mai-ḳhāna meñ hui shādī

dulhan ke itr se miltī hai aaj bū-e-sharāb

badan jo TuuT rahā hai zurūf-e-mai ke saath

banā hai kyā gul-e-ādam se har subū-e-sharāb

vo rashk-e-mai kare bālā-e-bām mai-ḳhvārī

ilāhī aaj ḳhat-e-kahkahshāñ ho jū-e-sharāb

zurūf-e-bāda-e-gul-gūñ ho mere kāñdhoñ par

farishtoñ se bhī maiñ uThvā.ūñ har subū-e-sharāb

khulā ye phūloñ ke hone se haal ai zāhid

pas-e-fanā bhī hai rindoñ ko ārzū-e-sharāb

sunā hai paas masīhā ke āftāb bhī hai

kareñge maut ke hiile se justujū-e-sharāb

na ho sakī koī ta.azīr-e-mai-kashī sābit

ziyāda had se baḌhī aaj guftugū-e-sharāb

gadā-e-bāda huuñ ulfat meñ chashm-e-maigūñ ke

tire faqīr kā toñbā banā kadū-e-sharāb

huzūr-e-duḳhtar-e-zar haath paañv kāñpte haiñ

tamām mastoñ ko rāsha hai rū-ba-rū-e-sharāb

'munīr' sāqī-e-kausar se luuñ sharāb-e-tuhūr

kabhī maiñ aañkh uThā kar na dekhūñ sū-e-sharāb

jo zauq hai ki ho daryaft aabru-e-sharab

to chashm-e-jam se ai shaiKH dekh su-e-sharab

kabhi to de gul-e-dastar-e-shaiKH bu-e-sharab

qaba ki bel mein yarab lage kadu-e-sharab

wo mast hain jo hain majruh-e-tegh-e-mauja-e-mai

jigar ke chaak pe ai gul bane subu-e-sharab

jo aashiq-e-lab-e-be-gun-e-yar ho farhad

to be-sutun se bhi jae shir-e-ju-e-sharab

wo mast hain ki jo tija pas-e-fana hoga

hamare phul banenge gul-e-kadu-e-sharab

hamesha mai-kade mein KHush-qadon ka majma hai

hazaron sarw lage hain kinare ju-e-sharab

lagain tak ke us mast ne jo talwaren

dahan-e-zaKHm-e-badan se bhi aai bu-e-sharab

Dubo diya mujhe tufan-e-mai ne ai saqi

amiq-tar qadd-e-amdam se nikle ju-e-sharab

namaz shukr ki paDhta hai jam toD ke shaiKH

wazu ke waste leta hai aabru-e-sharab

wo rashk-e-hur mai-e-mushkbu ka KHwahan hai

gul-e-bahisht hai mushtaq-e-rang-o-bu-e-sharab

sada-e-qulqul-e-mina se ho gaya sabit

ki peT bhar ke karen mast guftugu-e-sharab

ba-rang-e-shisha-e-mai ab ki fasl-e-barish mein

karenge baiTh ke kashti mein sair-e-ju-e-sharab

khula ye shishon ke jhukne se haal ai saqi

ki sar-kashi nahin lazim hai ru-ba-ru-e-sharab

asir-e-dam-e-alaeq hon kis tarah mai-KHwar

ki rassiyon mein nahin bandhte subu-e-sharab

na ho jo kisht-e-amal apni sabz ai saqi

riyaz-e-KHuld se hum kaT laen ju-e-sharab

ilaj-e-zoaf-e-basar nur-e-mai hai maston ko

hamari aaankhon ki chashma banegi ju-e-sharab

pata laga ke gaya su-e-gulshan-e-jannat

kahan kahan nahin ki main ne justuju-e-sharab

kisi ne saghar-e-mai se gulon ko di tashbih

nasim-e-bagh se aai jo aaj bu-e-sharab

milenge saghar-o-mina jo KHali use saqi

karenge dida-o-dil apni justuju-e-sharab

kiya jo mai-kashon ne azm-e-sair-e-alam-e-ab

to badle tonbon ke hath aa gai kadu-e-sharab

KHarid-e-jins-e-shafaat mein hogi kaifiyat

hamari ganTh mein hai naqd-e-abru-e-sharab

bahak ke jaun jo masti mein jaanib-e-kausar

to mujh ko dast-e-subu khinch lae su-e-sharab

ye kis ke aane se mai-KHana mein hui shadi

dulhan ke itr se milti hai aaj bu-e-sharab

badan jo TuT raha hai zuruf-e-mai ke sath

bana hai kya gul-e-adam se har subu-e-sharab

wo rashk-e-mai kare baala-e-baam mai-KHwari

ilahi aaj KHat-e-kahkahshan ho ju-e-sharab

zuruf-e-baada-e-gul-gun ho mere kandhon par

farishton se bhi main uThwaun har subu-e-sharab

khula ye phulon ke hone se haal ai zahid

pas-e-fana bhi hai rindon ko aarzu-e-sharab

suna hai pas masiha ke aaftab bhi hai

karenge maut ke hile se justuju-e-sharab

na ho saki koi tazir-e-mai-kashi sabit

ziyaada had se baDhi aaj guftugu-e-sharab

gada-e-baada hun ulfat mein chashm-e-maigun ke

tere faqir ka tonba bana kadu-e-sharab

huzur-e-duKHtar-e-zar hath panw kanpte hain

tamam maston ko rasha hai ru-ba-ru-e-sharab

'munir' saqi-e-kausar se lun sharab-e-tuhur

kabhi main aankh uTha kar na dekhun su-e-sharab