jo zindagi bachi hai use mat gawaiye

jo zindagī bachī hai use mat ga.vāiye

behtar ye hai ki aap mujhe bhuul jā.iye

har aan ik judā.ī hai ḳhud apne aap se

har aan kā hai zaḳhm jo har aan khā.iye

thī mashvarat kī ham ko basānā hai ghar nayā

dil ne kahā ki mere dar-o-bām Dhā.iye

thūkā hai maiñ ne ḳhuun hamesha mazāq meñ

merā mazāq aap hamesha uḌā.iye

hargiz mire huzūr kabhī aa.iye na aap

aur aa.iye agar to ḳhudā ban ke aa.iye

ab koī bhī nahīñ hai koī dil-mohalle meñ

kis kis galī meñ jā.iye aur gul machā.iye

ik taur-e-dah-sadī thā jo be-taur ho gayā

ab jantarī bajā.iye tārīḳh gā.iye

ik lāl-qil.a thā jo miyāñ zard paḌ gayā

ab rañg-rez kaun se kis jā se lā.iye

shā.ir hai aap ya.anī ki saste latīf-go

rishtoñ ko dil se roiye sab ko hañsā.iye

jo hālatoñ kā daur thā vo to guzar gayā

dil ko jalā chuke haiñ so ab ghar jalā.iye

ab kyā fareb dījiye aur kis ko dījiye

ab kyā fareb khā.iye aur kis se khā.iye

hai yaad par madār mere kārobār kā

hai arz aap mujh ko bahut yaad aa.iye

bas filoñ kā bojh uThāyā kareñ janāb

misra ye 'jaun' kā hai ise mat uThā.iye

jo zindagi bachi hai use mat gawaiye

behtar ye hai ki aap mujhe bhul jaiye

har aan ek judai hai KHud apne aap se

har aan ka hai zaKHm jo har aan khaiye

thi mashwarat ki hum ko basana hai ghar naya

dil ne kaha ki mere dar-o-baam Dhaiye

thuka hai main ne KHun hamesha mazaq mein

mera mazaq aap hamesha uDaiye

hargiz mere huzur kabhi aaiye na aap

aur aaiye agar to KHuda ban ke aaiye

ab koi bhi nahin hai koi dil-mohalle mein

kis kis gali mein jaiye aur gul machaiye

ek taur-e-dah-sadi tha jo be-taur ho gaya

ab jantari bajaiye tariKH gaiye

ek lal-qila tha jo miyan zard paD gaya

ab rang-rez kaun se kis ja se laiye

shair hai aap yani ki saste latif-go

rishton ko dil se roiye sab ko hansaiye

jo haalaton ka daur tha wo to guzar gaya

dil ko jala chuke hain so ab ghar jalaiye

ab kya fareb dijiye aur kis ko dijiye

ab kya fareb khaiye aur kis se khaiye

hai yaad par madar mere karobar ka

hai arz aap mujh ko bahut yaad aaiye

bas filon ka bojh uThaya karen janab

misra ye 'jaun' ka hai ise mat uThaiye