jo ziyan dil ka hua us ka izala ho jaun

jo ziyāñ dil kā huā us kā izāla ho jā.ūñ

ab to iz.hār-e-mohabbat kā salīqa ho jā.ūñ

khīñchnā hai tire dāman ko harīfāna mujhe

ik zarā ruk mire yūsuf maiñ zuleḳhā ho jā.ūñ

maiñ sitāre kī tarah vaqt pe hotā huuñ ġhurūb

shab tirā saath rahā ab maiñ saverā ho jā.ūñ

tere bīmār kā hotā hai maraz aur sivā

tū jo bīmār ho merā to maiñ achchhā ho jā.ūñ

maiñ shanāvar huuñ zamāne ke bhare dariyā kā

paar utarnā ho tujhe gar to safīna ho jā.ūñ

itnā be-dard abhī dil to nahīñ hai merā

saath kyuuñ chhoḌ duuñ apnā maiñ zamāna ho jā.ūñ

vaqt-e-ruḳhsat to chamak apnī dikhānī hai mujhe

chāñd banñe se rahā sub.h kā taarā ho jā.ūñ

jo ziyan dil ka hua us ka izala ho jaun

ab to izhaar-e-mohabbat ka saliqa ho jaun

khinchna hai tere daman ko harifana mujhe

ek zara ruk mere yusuf main zuleKHa ho jaun

main sitare ki tarah waqt pe hota hun ghurub

shab tera sath raha ab main sawera ho jaun

tere bimar ka hota hai maraz aur siwa

tu jo bimar ho mera to main achchha ho jaun

main shanawar hun zamane ke bhare dariya ka

par utarna ho tujhe gar to safina ho jaun

itna be-dard abhi dil to nahin hai mera

sath kyun chhoD dun apna main zamana ho jaun

waqt-e-ruKHsat to chamak apni dikhani hai mujhe

chand banne se raha subh ka tara ho jaun