joban un ka uThan par kuchh hai

joban un kā uThān par kuchh hai

ab mizāj āsmān par kuchh hai

kyā Thikānā hai baat kā un kī

dil meñ kuchh hai zabān par kuchh hai

va.ada hai ġhair se ye hiila hai

kaam mujh ko makān par kuchh hai

huur kā zikr kyuuñ kiyā dam-e-marg

shub.h mere bayān par kuchh hai

gum-shuda dil na ho kahīñ merā

un kī mahram kī paan par kuchh hai

ho ke rusvā kise kiyā rusvā

zikr sab kī zabān par kuchh hai

kyuuñ na ho shauq jalva-e-lab-e-bām

ab javānī uThān par kuchh hai

kaho mehmān-e-ġham se ab ruḳhsat

qarz kyā mezbān par kuchh hai

bañg hī de jo mai nahīñ vaa.iz

terī ūñchī dukān par kuchh hai

maiñ ne ghūrā to ham-damoñ se kahā

dekho us naujavān par kuchh hai

rakh diyā haath un se ye kah kar

Thahro ai jaan raan par kuchh hai

koī chhup kar gayā hai ġhair ke ghar

shak qadam ke nishān par kuchh hai

baale pahne ulaT ke kānoñ meñ

aur ghabrā.e kaan par kuchh hai

huuñ yahāñ is liye dakan ko 'riyāz'

rashk hindostān par kuchh hai

joban un ka uThan par kuchh hai

ab mizaj aasman par kuchh hai

kya Thikana hai baat ka un ki

dil mein kuchh hai zaban par kuchh hai

wada hai ghair se ye hila hai

kaam mujh ko makan par kuchh hai

hur ka zikr kyun kiya dam-e-marg

shubh mere bayan par kuchh hai

gum-shuda dil na ho kahin mera

un ki mahram ki pan par kuchh hai

ho ke ruswa kise kiya ruswa

zikr sab ki zaban par kuchh hai

kyun na ho shauq jalwa-e-lab-e-baam

ab jawani uThan par kuchh hai

kaho mehman-e-gham se ab ruKHsat

qarz kya mezban par kuchh hai

bang hi de jo mai nahin waiz

teri unchi dukan par kuchh hai

main ne ghura to ham-damon se kaha

dekho us naujawan par kuchh hai

rakh diya hath un se ye kah kar

Thahro ai jaan ran par kuchh hai

koi chhup kar gaya hai ghair ke ghar

shak qadam ke nishan par kuchh hai

baale pahne ulaT ke kanon mein

aur ghabrae kan par kuchh hai

hun yahan is liye dakan ko 'riyaz'

rashk hindostan par kuchh hai