josh-e-junun ko koi bhi paimana chahiye

josh-e-junūñ ko koī bhī paimāna chāhiye

paanī ko ab to sar se guzar jaanā chāhiye

mere alāva kaun hai us kā koī nahīñ

lāsh-e-ḳhayāl-e-yār ko kafnānā chāhiye

mānūsiyat ne ghar kī fazā ko badal diyā

dīvār-o-dar ko maiñ nahīñ begāna chāhiye

mumkin hai umr bhar kī thakan nazr-e-lahr ho

sāhil kī ret par mujhe sustānā chāhiye

kal ho na ho vo aa.e na aa.e so aaj hī

pahlū meñ ḳhush-jamāl ke mar jaanā chāhiye

bīmār jab supurd-e-ḳhudā kar diyā to phir

ab kis liye duāoñ kā nazrāna chāhiye

maiñ haath mal rahī huuñ 'humā' us se ruuTh kar

dil meñ sahī use bhī to pachhtānā chāhiye

josh-e-junun ko koi bhi paimana chahiye

pani ko ab to sar se guzar jaana chahiye

mere alawa kaun hai us ka koi nahin

lash-e-KHayal-e-yar ko kafnana chahiye

manusiyat ne ghar ki faza ko badal diya

diwar-o-dar ko main nahin begana chahiye

mumkin hai umr bhar ki thakan nazr-e-lahr ho

sahil ki ret par mujhe sustana chahiye

kal ho na ho wo aae na aae so aaj hi

pahlu mein KHush-jamal ke mar jaana chahiye

bimar jab supurd-e-KHuda kar diya to phir

ab kis liye duaon ka nazrana chahiye

main hath mal rahi hun 'huma' us se ruTh kar

dil mein sahi use bhi to pachhtana chahiye