josh-e-junun mein nikle hain jab apne ghar se hum

josh-e-junūñ meñ nikle haiñ jab apne ghar se ham

mil mil ke ḳhuub ro.e haiñ dīvār-o-dar se ham

taqdīr kā likhā na miTegā kisī tarah

ragḌeñ hazār sar ko tire sang-e-dar se ham

achchhī kahī ki vasl meñ ham se na boliye

bāteñ kareñge aaj bhī dīvār-o-dar se ham

ulfat raqīb kī na chhupegī kisī tarah

ai jaan taaḌ leñge tumhārī nazar se ham

chalne ko chalte haiñ magar ai bānī-e-fasād

zinda na phir ke ā.eñge dushman ke ghar se ham

phūTe hue nasīb kī ye bhī haiñ gardisheñ

sar phoḌte jo phirte haiñ dīvār-o-dar se ham

din ho gayā tamām na matlab huā tamām

likhte haiñ naama yaar ko baiThe sahar se ham

dekho jo aañkh uThā ke to jhuñjhlā ke kahte haiñ

tang aa.e bahut hī haiñ baḌoñ kī nazar se ham

ye rashk hai ki yaar se bāteñ karegā ye

laḌte haiñ baat baat pe paiġhāmbar se ham

dekheñge kitnī apnī muqaddar meñ hai kajī

ik din milā.eñge tirī tirchhī nazar se ham

shāyad tire huzūr meñ pahuñchā de ḳhatt-e-shauq

paidā kareñge rabt tire nāma-bar se ham

dikhlā.eñge kabhī asar-e-āh-e-ātishīñ

samjheñge ek din falak-e-fitna-gar se ham

bahlā rahe haiñ dil shab-e-tanhā.ī-e-firāq

pahroñ se bāteñ karte haiñ dīvār-o-dar se ham

vahshat ye chāhtī hai ki sahrā kī sair ho

dil chāhtā hai mar ke uTheñ us ke dar se ham

'shabnam' kī kuchh ḳhabar nahīñ kis haal meñ hai ab

pūchheñge ek roz nasīm-e-sahar se ham

josh-e-junun mein nikle hain jab apne ghar se hum

mil mil ke KHub roe hain diwar-o-dar se hum

taqdir ka likha na miTega kisi tarah

ragDen hazar sar ko tere sang-e-dar se hum

achchhi kahi ki wasl mein hum se na boliye

baaten karenge aaj bhi diwar-o-dar se hum

ulfat raqib ki na chhupegi kisi tarah

ai jaan taD lenge tumhaari nazar se hum

chalne ko chalte hain magar ai bani-e-fasad

zinda na phir ke aaenge dushman ke ghar se hum

phuTe hue nasib ki ye bhi hain gardishen

sar phoDte jo phirte hain diwar-o-dar se hum

din ho gaya tamam na matlab hua tamam

likhte hain nama yar ko baiThe sahar se hum

dekho jo aankh uTha ke to jhunjhla ke kahte hain

tang aae bahut hi hain baDon ki nazar se hum

ye rashk hai ki yar se baaten karega ye

laDte hain baat baat pe paighambar se hum

dekhenge kitni apni muqaddar mein hai kaji

ek din milaenge teri tirchhi nazar se hum

shayad tere huzur mein pahuncha de KHatt-e-shauq

paida karenge rabt tere nama-bar se hum

dikhlaenge kabhi asar-e-ah-e-atishin

samjhenge ek din falak-e-fitna-gar se hum

bahla rahe hain dil shab-e-tanhai-e-firaq

pahron se baaten karte hain diwar-o-dar se hum

wahshat ye chahti hai ki sahra ki sair ho

dil chahta hai mar ke uThen us ke dar se hum

'shabnam' ki kuchh KHabar nahin kis haal mein hai ab

puchhenge ek roz nasim-e-sahar se hum