josh-o-KHarosh par hai bahaar-e-chaman hanuz

josh-o-ḳharosh par hai bahār-e-chaman hanūz

piite haiñ nau-javān sharāb-e-kuhan hanūz

paatā nahīñ maiñ yaar ko mel-e-suḳhan hanūz

ma.adūm hai kamar kī tarah se dahan hanūz

barsoñ se ro rahā huuñ shab-o-roz muttasil

hañste haiñ muddatoñ se mire zaḳhm-e-tan hanūz

ruḳhsār-e-yār par nahīñ āġhāz-e-ḳhat abhī

dekhā nahīñ in āñkhoñ ne sūraj gahan hanūz

anjām-e-kār kā nahīñ aatā ḳhayāl kuchh

ġhurbat meñ bhūle baiThe haiñ yār-e-vatan hanūz

aalam un abruoñ kī kajī kā jo hai so hai

bal khā rahī hai zulf-e-shikan-dar-shikan hanūz

ḳhil.at kī kyā umiid rakheñ āsmāñ se ham

us ne to daab rakkhā hai apnā kafan hanūz

aalam hijāb-e-yār kā tā-hāl hai vahī

ḳhalvat-nashīñ hai raushnī-e-anjuman hanūz

apne safā-e-sīna kā hairān kaar hai

dekhā nahīñ hai aa.ine ne vo badan hanūz

har-chand bāġh-e-dahr meñ muddat se huuñ muqīm

'ātish' nazar paḌā na vo seb-e-zaqan hanūz

josh-o-KHarosh par hai bahaar-e-chaman hanuz

pite hain nau-jawan sharab-e-kuhan hanuz

pata nahin main yar ko mel-e-suKHan hanuz

madum hai kamar ki tarah se dahan hanuz

barson se ro raha hun shab-o-roz muttasil

hanste hain muddaton se mere zaKHm-e-tan hanuz

ruKHsar-e-yar par nahin aaghaz-e-KHat abhi

dekha nahin in aankhon ne suraj gahan hanuz

anjam-e-kar ka nahin aata KHayal kuchh

ghurbat mein bhule baiThe hain yar-e-watan hanuz

aalam un abruon ki kaji ka jo hai so hai

bal kha rahi hai zulf-e-shikan-dar-shikan hanuz

KHilat ki kya umid rakhen aasman se hum

us ne to dab rakkha hai apna kafan hanuz

aalam hijab-e-yar ka ta-haal hai wahi

KHalwat-nashin hai raushni-e-anjuman hanuz

apne safa-e-sina ka hairan kar hai

dekha nahin hai aaine ne wo badan hanuz

har-chand bagh-e-dahr mein muddat se hun muqim

'atish' nazar paDa na wo seb-e-zaqan hanuz