josh par rang-e-tarab dekh ke maiKHane ka

josh par rang-e-tarab dekh ke maiḳhāne kā

jhuk ke muñh chuum liyā shīshe ne paimāne kā

saaz ishrat se nikaltī hai sadā-e-mātam

kyā ye duniyā hai muraqqā mire ġham ḳhāne kā

nazar aatī hai har ik but meñ ḳhudā kī qudrat

silsila ka.aba se miltā hai sanam-ḳhāne kā

mil ga.ī mil ga.ī daad apnī vafāoñ kī mujhe

hans diye sun ke vo qissa mare mar jaane kā

kunj-e-marqad meñ bhī ārām se sonā ma.alūm

naqsh abhī dil meñ hai guzre hue afsāne kā

sham.a ro ro ke isī ġham meñ ghulī jaatī hai

ḳhūn-e-nāhaq mirī gardan pe hai parvāne kā

dīd-e-tar ne kiye raah meñ dariyā haa.il

qasd us ne jo kiyā dil se kabhī jaane kā

haram-o-dair meñ kis tarah lage dil us kā

jis kī nazroñ meñ ho naqsha tire kāshāne kā

dekh jaao mire marne kā tamāshā tum bhī

āḳhirī baab hai ye ziist ke afsāne kā

husn aur ishq kī tafsīr mukammal ho jaa.e

sham.a ke saath rahe tazkira parvāne kā

'maḳhfī' is tarah se kuchh umr basar kī ham ne

zindagī kā huā itlāq na mar jaane kā

josh par rang-e-tarab dekh ke maiKHane ka

jhuk ke munh chum liya shishe ne paimane ka

saz ishrat se nikalti hai sada-e-matam

kya ye duniya hai muraqqa mere gham KHane ka

nazar aati hai har ek but mein KHuda ki qudrat

silsila kaba se milta hai sanam-KHane ka

mil gai mil gai dad apni wafaon ki mujhe

hans diye sun ke wo qissa mare mar jaane ka

kunj-e-marqad mein bhi aaram se sona malum

naqsh abhi dil mein hai guzre hue afsane ka

shama ro ro ke isi gham mein ghuli jati hai

KHun-e-nahaq meri gardan pe hai parwane ka

did-e-tar ne kiye rah mein dariya hail

qasd us ne jo kiya dil se kabhi jaane ka

haram-o-dair mein kis tarah lage dil us ka

jis ki nazron mein ho naqsha tere kashane ka

dekh jao mere marne ka tamasha tum bhi

aaKHiri bab hai ye zist ke afsane ka

husn aur ishq ki tafsir mukammal ho jae

shama ke sath rahe tazkira parwane ka

'maKHfi' is tarah se kuchh umr basar ki hum ne

zindagi ka hua itlaq na mar jaane ka