josh par thin sifat-e-abr-e-bahaari aankhen

josh par thiiñ sifat-e-abr-e-bahārī āñkheñ

ba ga.iiñ āñsuoñ ke saath hamārī āñkheñ

haiñ jilau meñ sifat-e-abr-e-bahārī āñkheñ

uThne detī haiñ kahāñ gard-e-savārī āñkheñ

kyuuñ asīrān-e-qafas kī taraf aanā chhoḌā

pher liiñ tū ne bhī ai bād-e-bahārī āñkheñ

sāmne aa ga.ī gul-gasht meñ nargis shāyad

palkoñ se chīñ-ba-jabīñ haiñ jo tumhārī āñkheñ

kyā durr-e-ashk se haiñ dāman-e-mizhgāñ mamlū

kab zabāñ hai ki kareñ shukr-guzārī āñkheñ

dekhte haiñ taraf-e-chāh-e-zaqan ulfat se

muft meñ ham ko Dubotī haiñ hamārī āñkheñ

shoḳhiyāñ āhuoñ kī zehn meñ kab aatī haiñ

kuchh dinoñ ham ne bhī dekhī thiiñ tumhārī āñkheñ

qatra-e-āb ko muhtāj kiyā gardūñ ne

yād-e-ayyām ki thiiñ chashma-e-jārī āñkheñ

duur se dekh ke tum ko koī jī bhartā hai

kar rahī haiñ faqat ayyām-guzārī āñkheñ

abr ko dekh ke har martaba josh aatā hai

ab to aa.iiñ haiñ mire zabt se aarī āñkheñ

jab haTā aa.ina aage se huiiñ kyā bechain

apne par aap hī āshiq haiñ tumhārī āñkheñ

lutf dekhā na kisī chiiz kā ashkoñ ke sivā

aa.iiñ thiiñ rone ko duniyā meñ hamārī āñkheñ

kahtī hai bhar ke dam-e-sard ḳhizāñ meñ bulbul

DhūñDhtī haiñ tujhe ai fasl-e-bahārī āñkheñ

tum ko sharm aatī hai ham qābil-e-nazzāra nahīñ

na rahā husn tumhārā na hamārī āñkheñ

kyuuñ charāgāh-e-ġhazālāñ na kahūñ palkoñ ko

phir rahī haiñ merī nazroñ meñ tumhārī āñkheñ

ro.uuñ kis vāste gar sāmne aanā chhoḌā

aap ko husn hai pyārā mujhe pyārī āñkheñ

kor ho jā.ūñ magar ishq meñ rone ko na rok

nāsehā dil se ziyāda nahīñ pyārī āñkheñ

saikḌoñ shīsha-e-dil bāda-kashoñ ke toḌe

mohtasib se haiñ ziyāda vo ḳhumārī āñkheñ

phuul nargis ke gire shāḳh se Daalī jo nazar

terī āñkhoñ kī itā.at meñ haiñ saarī āñkheñ

farsh ho jaatī haiñ tum paañv jahāñ rakhte ho

adab-āmoz-e-mohabbat haiñ hamārī āñkheñ

ba.ad muddat ke zarā hosh meñ aayā huuñ aaj

phir dikhā de mujhe saaqī vo ḳhumārī āñkheñ

ashk-e-ḳhūnīñ se asīrī meñ uThā lutf-e-bahār

hai qafas rashk-e-chaman abar-e-bahārī āñkheñ

kyā kareñ bazm-e-hasīnāñ meñ 'ta.ashushuq' jā kar

na rahīñ qābil-e-nazzāra hamārī āñkheñ

josh par thin sifat-e-abr-e-bahaari aankhen

ba gain aansuon ke sath hamari aankhen

hain jilau mein sifat-e-abr-e-bahaari aankhen

uThne deti hain kahan gard-e-sawari aankhen

kyun asiran-e-qafas ki taraf aana chhoDa

pher lin tu ne bhi ai baad-e-bahaari aankhen

samne aa gai gul-gasht mein nargis shayad

palkon se chin-ba-jabin hain jo tumhaari aankhen

kya durr-e-ashk se hain daman-e-mizhgan mamlu

kab zaban hai ki karen shukr-guzari aankhen

dekhte hain taraf-e-chah-e-zaqan ulfat se

muft mein hum ko Duboti hain hamari aankhen

shoKHiyan aahuon ki zehn mein kab aati hain

kuchh dinon hum ne bhi dekhi thin tumhaari aankhen

qatra-e-ab ko muhtaj kiya gardun ne

yaad-e-ayyam ki thin chashma-e-jari aankhen

dur se dekh ke tum ko koi ji bharta hai

kar rahi hain faqat ayyam-guzari aankhen

abr ko dekh ke har martaba josh aata hai

ab to aain hain mere zabt se aari aankhen

jab haTa aaina aage se huin kya bechain

apne par aap hi aashiq hain tumhaari aankhen

lutf dekha na kisi chiz ka ashkon ke siwa

aain thin rone ko duniya mein hamari aankhen

kahti hai bhar ke dam-e-sard KHizan mein bulbul

DhunDhti hain tujhe ai fasl-e-bahaari aankhen

tum ko sharm aati hai hum qabil-e-nazzara nahin

na raha husn tumhaara na hamari aankhen

kyun charagah-e-ghazalan na kahun palkon ko

phir rahi hain meri nazron mein tumhaari aankhen

roun kis waste gar samne aana chhoDa

aap ko husn hai pyara mujhe pyari aankhen

kor ho jaun magar ishq mein rone ko na rok

naseha dil se ziyaada nahin pyari aankhen

saikDon shisha-e-dil baada-kashon ke toDe

mohtasib se hain ziyaada wo KHumari aankhen

phul nargis ke gire shaKH se Dali jo nazar

teri aankhon ki itaat mein hain sari aankhen

farsh ho jati hain tum panw jahan rakhte ho

adab-amoz-e-mohabbat hain hamari aankhen

baad muddat ke zara hosh mein aaya hun aaj

phir dikha de mujhe saqi wo KHumari aankhen

ashk-e-KHunin se asiri mein uTha lutf-e-bahaar

hai qafas rashk-e-chaman abar-e-bahaari aankhen

kya karen bazm-e-hasinan mein 'tashushuq' ja kar

na rahin qabil-e-nazzara hamari aankhen