joshish-e-ashk se hun aaTh pahr pani mein

joshish-e-ashk se huuñ aaTh pahr paanī meñ

garche hote haiñ bahut ḳhauf-o-ḳhatar paanī meñ

zabt-e-girya ne jalāyā hai darūna saarā

dil achambhā hai ki hai soḳhta-tar paanī meñ

āb-e-shamshīr-e-qayāmat hai burinda us kī

ye gavārā.ī nahīñ paate haiñ har paanī meñ

tab-e-dariyā jo ho āshufta to phir tūfāñ hai

aah bāloñ ko parāganda na kar paanī meñ

ġharq āb-e-ashk se huuñ lek uḌā jaatā huuñ

juuñ samak go ki mire Duube haiñ par paanī meñ

mardum-e-dīda-e-tar mardum-e-ābī haiñ magar

rahte haiñ roz o shab o shām-o-sahar paanī meñ

hai.at āñkhoñ kī nahīñ vo rahī rote rote

ab to girdāb se aate haiñ nazar paanī meñ

girya-e-shab se bahut aañkh Dare hai merī

paañv rukte hī nahīñ bār-e-digar paanī meñ

fart-e-girya se huā 'mīr' tabāh apnā jahāz

taḳhta paare ga.e kyā jānūñ kidhar paanī meñ

joshish-e-ashk se hun aaTh pahr pani mein

garche hote hain bahut KHauf-o-KHatar pani mein

zabt-e-girya ne jalaya hai daruna sara

dil achambha hai ki hai soKHta-tar pani mein

aab-e-shamshir-e-qayamat hai burinda us ki

ye gawarai nahin pate hain har pani mein

tab-e-dariya jo ho aashufta to phir tufan hai

aah baalon ko paraganda na kar pani mein

gharq aab-e-ashk se hun lek uDa jata hun

jun samak go ki mere Dube hain par pani mein

mardum-e-dida-e-tar mardum-e-abi hain magar

rahte hain roz o shab o sham-o-sahar pani mein

haiat aankhon ki nahin wo rahi rote rote

ab to girdab se aate hain nazar pani mein

girya-e-shab se bahut aankh Dare hai meri

panw rukte hi nahin bar-e-digar pani mein

fart-e-girya se hua 'mir' tabah apna jahaz

taKHta pare gae kya jaanun kidhar pani mein