jugnu ke sath sath hi mahtab bhi to hain

jugnū ke saath saath hī mahtāb bhī to haiñ

ham dariyā-burd gauhar-e-nāyāb bhī to haiñ

yuuñ hī nahīñ haiñ la.al-o-guhar apne haath meñ

dariyā ke ham vajūd meñ ġharqāb bhī to haiñ

tum ko to sirf maujoñ pe hāsil hai bartarī

dariyā-e-kū-e-yār meñ girdāb bhī to haiñ

jaa.ez haiñ be-qarāriyāñ lekin janāb-e-dil

us kī navāzishoñ ke kuchh ādāb bhī to haiñ

bas ik jhalak dikhā ke kahāñ chal diye huzūr

in be-qarār āñkhoñ meñ kuchh ḳhvāb bhī to haiñ

phir kis tarah se pyaas ke māroñ ko sabr ho

kuchh log mere shahr meñ sairāb bhī to haiñ

ye kyā kī 'tashna' 'tashna' kahe jā rahe haiñ aap

'tashna' ke saath saath kuchh alqāb bhī to haiñ

jugnu ke sath sath hi mahtab bhi to hain

hum dariya-burd gauhar-e-nayab bhi to hain

yun hi nahin hain lal-o-guhar apne hath mein

dariya ke hum wajud mein gharqab bhi to hain

tum ko to sirf maujon pe hasil hai bartari

dariya-e-ku-e-yar mein girdab bhi to hain

jaez hain be-qarariyan lekin janab-e-dil

us ki nawazishon ke kuchh aadab bhi to hain

bas ek jhalak dikha ke kahan chal diye huzur

in be-qarar aankhon mein kuchh KHwab bhi to hain

phir kis tarah se pyas ke maron ko sabr ho

kuchh log mere shahr mein sairab bhi to hain

ye kya ki 'tashna' 'tashna' kahe ja rahe hain aap

'tashna' ke sath sath kuchh alqab bhi to hain