junūn-e-shauq meñ apnī girah se kyā na gayā
ye aur baat ki ab tak vo hauslā na gayā
ġhubār-e-rāh the barsā juuñ hī sahāb-e-karam
kuchh aise baiTh ga.e ham ki phir uThā na gayā
ye hādisa hai ki afsāna-e-ġham-e-hastī
kahīñ kahā na gayā aur kahīñ sunā na gayā
kahāñ kahāñ ise dekhūñ kahāñ kahāñ jā.ūñ
talāsh ko vo koī dā.era banā na gayā
kahāñ kahāñ na añdheroñ ne rāsta rokā
magar ye shauq kahāñ mish.aleñ jalā na gayā
na ho sake mirī rāhoñ meñ fāsle haa.il
jahāñ maiñ ḳhud na gayā thā mirā fasāna gayā
junun-e-shauq mein apni girah se kya na gaya
ye aur baat ki ab tak wo hausla na gaya
ghubar-e-rah the barsa jun hi sahab-e-karam
kuchh aise baiTh gae hum ki phir uTha na gaya
ye hadisa hai ki afsana-e-gham-e-hasti
kahin kaha na gaya aur kahin suna na gaya
kahan kahan ise dekhun kahan kahan jaun
talash ko wo koi daera bana na gaya
kahan kahan na andheron ne rasta roka
magar ye shauq kahan mishalen jala na gaya
na ho sake meri rahon mein fasle hail
jahan main KHud na gaya tha mera fasana gaya
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.