junun ka raaz mohabbat ka bhed pa na saki

junūñ kā raaz mohabbat kā bhed pā na sakī

hamārā saath ye duniyā magar nibhā na sakī

bikhar gayā huuñ fazāoñ meñ bū-e-gul kī tarah

mire vajūd meñ vus.at mirī samā na sakī

har ik qadam pe salīb-āshnā mile mujh ko

ye kā.enāt vafāoñ kā baar uThā na sakī

paTak ke rah ga.ī sar apnā rahguzāroñ se

mirī sadā dil-e-kohsār meñ samā na sakī

khulī havā kī fasīloñ meñ zindagī hai asiir

fareb-e-rañg se māhaul ko basā na sakī

razā tulū-e-sahar tak hai zindagī shab kī

ye baat ahl-e-sitam kī samajh meñ aa na sakī

junun ka raaz mohabbat ka bhed pa na saki

hamara sath ye duniya magar nibha na saki

bikhar gaya hun fazaon mein bu-e-gul ki tarah

mere wajud mein wusat meri sama na saki

har ek qadam pe salib-ashna mile mujh ko

ye kaenat wafaon ka bar uTha na saki

paTak ke rah gai sar apna rahguzaron se

meri sada dil-e-kohsar mein sama na saki

khuli hawa ki fasilon mein zindagi hai asir

fareb-e-rang se mahaul ko basa na saki

raza tulu-e-sahar tak hai zindagi shab ki

ye baat ahl-e-sitam ki samajh mein aa na saki