junun kar-farma hua chahta hai

junūñ kār-farmā huā chāhtā hai

qadam dasht paimā huā chāhtā hai

dam-e-girya kis kā tasavvur hai dil meñ

ki ashk ashk dariyā huā chāhtā hai

ḳhat aane lage shikva-āmez un ke

milāp un se goyā huā chāhtā hai

bahut kaam lene the jis dil se ham ko

vo sarf-e-tamannā huā chāhtā hai

abhī lene paa.e nahīñ dam jahāñ meñ

ajal kā taqāzā huā chāhtā hai

mujhe kal ke vaade pe karte haiñ ruḳhsat

koī va.ada puurā huā chāhtā hai

fuzūñ tar hai kuchh in dinoñ zauq-e-isyāñ

dar-e-rahmat ab vā huā chāhtā hai

qalaq gar yahī hai to rāz-e-nihānī

koī din meñ rusvā huā chāhtā hai

vafā shart-e-ulfat hai lekin kahāñ tak

dil apnā bhī tujh sā huā chāhtā hai

bahut haz uThātā hai dil tujh se mil kar

qalaq dekhiye kyā huā chāhtā hai

ġham-e-rashk ko talḳh samjhe the hamdam

so vo bhī gavārā huā chāhtā hai

bahut chain se din guzarte haiñ 'hālī'

koī fitna barpā huā chāhtā hai

junun kar-farma hua chahta hai

qadam dasht paima hua chahta hai

dam-e-girya kis ka tasawwur hai dil mein

ki ashk ashk dariya hua chahta hai

KHat aane lage shikwa-amez un ke

milap un se goya hua chahta hai

bahut kaam lene the jis dil se hum ko

wo sarf-e-tamanna hua chahta hai

abhi lene pae nahin dam jahan mein

ajal ka taqaza hua chahta hai

mujhe kal ke wade pe karte hain ruKHsat

koi wada pura hua chahta hai

fuzun tar hai kuchh in dinon zauq-e-isyan

dar-e-rahmat ab wa hua chahta hai

qalaq gar yahi hai to raaz-e-nihani

koi din mein ruswa hua chahta hai

wafa shart-e-ulfat hai lekin kahan tak

dil apna bhi tujh sa hua chahta hai

bahut haz uThata hai dil tujh se mil kar

qalaq dekhiye kya hua chahta hai

gham-e-rashk ko talKH samjhe the hamdam

so wo bhi gawara hua chahta hai

bahut chain se din guzarte hain 'haali'

koi fitna barpa hua chahta hai