junun ke walwale jab ghuT gae dil mein nihan ho kar

junūñ ke valvale jab ghuT ga.e dil meñ nihāñ ho kar

to uTThe haiñ dhuāñ ho kar gire haiñ bijliyāñ ho kar

kuchh aage baḌh chale sāmān-e-rāhat lā-makāñ ho kar

falak pīchhe rahā jaatā hai gard-e-kārvāñ ho kar

kisī din to chale ai āsmāñ bād-e-murād aisī

ki utreñ kashtī-e-mai par ghaTā.eñ bādbāñ ho kar

na jaane kis bayābāñ marg ne miTTī nahīñ paa.ī

bagūle jā rahe haiñ kārvāñ-dar-kārvāñ ho kar

vafūr-e-zabt se betābī-e-dil baḌh nahīñ saktī

gale tak aa ke rah jaate haiñ naale hichkiyāñ ho kar

gulū-gīr ab to aisā inqalāb-e-rañg-e-ālam hai

ki naġhme nikle minqār-e-anādil se fuġhāñ ho kar

jo ho kar abr se māyūs ḳhud sīñche kabhī dahqāñ

jalā deñ khet ko paanī kī lahreñ bijliyāñ ho kar

jahāñ meñ vāshud-e-ḳhātir ke sāmāñ ho ga.e lāshe

jagah rāhat kī nā-mumkin huī hai lā-makāñ ho kar

hañse koī na bijlī ke sivā is dār-e-mātam meñ

agar rah jaa.e saarā khet kisht-e-za.afrāñ ho kar

alam meñ āshiyāñ ke is qadar tinke chune maiñ ne

ki āḳhir bā'is-e-taskīñ hue haiñ āshiyāñ ho kar

ghaTā.eñ ghir ke kyā kyā hasrat-e-farhād par roiiñ

chaman tak aa ga.iiñ nahreñ pahāḌoñ se ravāñ ho kar

dil-e-shaidā ne paayā 'ishq meñ me'rāj kā rutba

yahāñ aksar butoñ ke zulm TuuTe āsmāñ ho kar

jo Darte Darte dil se ek harf-e-shauq niklā thā

vo us ke sāmne aayā zabāñ par dāstāñ ho kar

nikal aa.e haiñ har iqrār meñ inkār ke pahlū

banā detī haiñ hairāñ terī bāteñ makr yaañ ho kar

nazākat kā ye 'ālam phuul bhī toḌe to bal khā kar

na jaane dil mirā kis tarah toḌā pahlvāñ ho kar

tadarrau-o-kabak par hañs kar uTThe ḳhud laḌkhaḌāte haiñ

subuk karte haiñ un ko pā.eñche bār-e-girāñ ho kar

galā ghoñTā hai zabt-e-ġham ne kuchh aisā ki mushkil hai

ki nikle muñh se āvāz-e-shikast-e-dil fuġhāñ ho kar

pata andesha-e-sālik ne paayā manzil-e-dil kā

tū palTā lā-makāñ se āsmāñ-dar-āsmāñ ho kar

huī phir dekhiye aa bustan-e-shādī-o-ġham duniyā

abhī paidā hue the ranj-o-rāhat to amaañ ho kar

jo niklī hogī koī aarzū to ye bhī niklegā

tumhārā tīr-e-hasrat ban gayā dil meñ nihāñ ho kar

utar jā.egā tū o āftāb-e-husn koThe se

giregā sāya-e-dīvār ham par āsmāñ ho kar

junun ke walwale jab ghuT gae dil mein nihan ho kar

to uTThe hain dhuan ho kar gire hain bijliyan ho kar

kuchh aage baDh chale saman-e-rahat la-makan ho kar

falak pichhe raha jata hai gard-e-karwan ho kar

kisi din to chale ai aasman baad-e-murad aisi

ki utren kashti-e-mai par ghaTaen baadban ho kar

na jaane kis bayaban marg ne miTTi nahin pai

bagule ja rahe hain karwan-dar-karwan ho kar

wafur-e-zabt se betabi-e-dil baDh nahin sakti

gale tak aa ke rah jate hain nale hichkiyan ho kar

gulu-gir ab to aisa inqalab-e-rang-e-alam hai

ki naghme nikle minqar-e-anadil se fughan ho kar

jo ho kar abr se mayus KHud sinche kabhi dahqan

jala den khet ko pani ki lahren bijliyan ho kar

jahan mein washud-e-KHatir ke saman ho gae lashe

jagah rahat ki na-mumkin hui hai la-makan ho kar

hanse koi na bijli ke siwa is dar-e-matam mein

agar rah jae sara khet kisht-e-zafran ho kar

alam mein aashiyan ke is qadar tinke chune main ne

ki aaKHir ba'is-e-taskin hue hain aashiyan ho kar

ghaTaen ghir ke kya kya hasrat-e-farhad par roin

chaman tak aa gain nahren pahaDon se rawan ho kar

dil-e-shaida ne paya 'ishq mein me'raj ka rutba

yahan aksar buton ke zulm TuTe aasman ho kar

jo Darte Darte dil se ek harf-e-shauq nikla tha

wo us ke samne aaya zaban par dastan ho kar

nikal aae hain har iqrar mein inkar ke pahlu

bana deti hain hairan teri baaten makr yan ho kar

nazakat ka ye 'alam phul bhi toDe to bal kha kar

na jaane dil mera kis tarah toDa pahlwan ho kar

tadarrau-o-kabak par hans kar uTThe KHud laDkhaDate hain

subuk karte hain un ko paenche bar-e-giran ho kar

gala ghonTa hai zabt-e-gham ne kuchh aisa ki mushkil hai

ki nikle munh se aawaz-e-shikast-e-dil fughan ho kar

pata andesha-e-salik ne paya manzil-e-dil ka

tu palTa la-makan se aasman-dar-asman ho kar

hui phir dekhiye aa bustan-e-shadi-o-gham duniya

abhi paida hue the ranj-o-rahat to aman ho kar

jo nikli hogi koi aarzu to ye bhi niklega

tumhaara tir-e-hasrat ban gaya dil mein nihan ho kar

utar jaega tu o aaftab-e-husn koThe se

girega saya-e-diwar hum par aasman ho kar