junun ki rah mein pahle dar-e-jaanana aata hai

junūñ kī raah meñ pahle dar-e-jānāna aatā hai

farāġhat hai phir is ke baad hī vīrāna aatā hai

ye dil kī baat hai aur baat ye dil hī samajhtā hai

hamāre paas aksar chal ke ḳhud mai-ḳhāna aatā hai

karo har gaam par sajde mohabbat kā taqāza hai

bahut nazdīk hai aur yaar kā kāshāna aatā hai

huī hai kārgar tarkīb mere dil kī ḳhvāhish kī

mujhe bīmār sun kar koī betābāna aatā hai

lagātī hai gale se sham.a us ko maiñ samajhtā huuñ

fanā ho kar baqā ke rañg meñ parvāna aatā hai

shafaq se mai barastī hai ajab gul-rañg hai aalam

nazar meñ merī sūraj sūrat-e-paimāna aatā hai

suḳhan hai mo'atabar terā 'suhail' us ne kahā mujh se

qalam se tere aksar sher ustādāna aatā hai

junun ki rah mein pahle dar-e-jaanana aata hai

faraghat hai phir is ke baad hi virana aata hai

ye dil ki baat hai aur baat ye dil hi samajhta hai

hamare pas aksar chal ke KHud mai-KHana aata hai

karo har gam par sajde mohabbat ka taqaza hai

bahut nazdik hai aur yar ka kashana aata hai

hui hai kargar tarkib mere dil ki KHwahish ki

mujhe bimar sun kar koi betabana aata hai

lagati hai gale se shama us ko main samajhta hun

fana ho kar baqa ke rang mein parwana aata hai

shafaq se mai barasti hai ajab gul-rang hai aalam

nazar mein meri suraj surat-e-paimana aata hai

suKHan hai mo'atabar tera 'suhail' us ne kaha mujh se

qalam se tere aksar sher ustadana aata hai