junun ki rakh se manzil mein rang kya aae

junūñ kī raakh se manzil meñ rañg kyā aa.e

matā-e-dard to ham raah meñ luTā aa.e

vo gard uḌaa.ī kisī ne ki saañs ghuTne lagī

haTe ye raah se dīvār to havā aa.e

kisī maqām-e-tamannā se jab bhī palTe haiñ

hamāre sāmne apne hī naqsh-e-pā aa.e

numū ke bojh se shāḳheñ na TuuT jaa.eñ kahīñ

tum aao to koī ġhuncha khile sabā aa.e

ye dil kī pyaas ye duniyā ke fāsle 'bāqī'

bahut qarīb se ab to koī sadā aa.e

junun ki rakh se manzil mein rang kya aae

mata-e-dard to hum rah mein luTa aae

wo gard uDai kisi ne ki sans ghuTne lagi

haTe ye rah se diwar to hawa aae

kisi maqam-e-tamanna se jab bhi palTe hain

hamare samne apne hi naqsh-e-pa aae

numu ke bojh se shaKHen na TuT jaen kahin

tum aao to koi ghuncha khile saba aae

ye dil ki pyas ye duniya ke fasle 'baqi'

bahut qarib se ab to koi sada aae