junun sukun KHirad iztirab chahti hai

junūñ sukūn ḳhirad iztirāb chāhtī hai

tabī.at aaj nayā inqalāb chāhtī hai

na aaj terī nazar se baras rahā hai nasha

na merī tishna-labī hī sharāb chāhtī hai

nahīñ surūr-e-musalsal nibāh par mauqūf

mudām aañkh kahāñ lutf-e-ḳhvāb chāhtī hai

sunā rahā huuñ fasāna tirī mohabbat kā

ye kā.enāt amal kā hisāb chāhtī hai

vo azm-hā-e-safar lā-zavāl hote haiñ

hayāt maut ko jab ham-rikāb chāhtī hai

jhulas rahā hai badan dhuup meñ javānī kī

ye aag zulf kā gahrā sahāb chāhtī hai

harīf-e-husn-o-mohabbat ho der tak 'shaukat'

nigār-e-umr vo ahd-e-shabāb chāhtī hai

junun sukun KHirad iztirab chahti hai

tabiat aaj naya inqalab chahti hai

na aaj teri nazar se baras raha hai nasha

na meri tishna-labi hi sharab chahti hai

nahin surur-e-musalsal nibah par mauquf

mudam aankh kahan lutf-e-KHwab chahti hai

suna raha hun fasana teri mohabbat ka

ye kaenat amal ka hisab chahti hai

wo azm-ha-e-safar la-zawal hote hain

hayat maut ko jab ham-rikab chahti hai

jhulas raha hai badan dhup mein jawani ki

ye aag zulf ka gahra sahab chahti hai

harif-e-husn-o-mohabbat ho der tak 'shaukat'

nigar-e-umr wo ahd-e-shabab chahti hai