jurm tera na sahi meri saza KHub sahi

jurm terā na sahī merī sazā ḳhuub sahī

ā.ina-ḳhāna-e-hastī kī adā ḳhuub sahī

paas se to tirī āñkhoñ ke bhañvar le Duube

duur se jalva-e-girdāb-e-balā ḳhuub sahī

kaisā sāvan hai ki jo khul ke barastā hī nahīñ

dekhne meñ tirī zulfoñ kī ghaTā ḳhuub sahī

ghar meñ jo baat hai vo tere shabistāñ meñ kahāñ

jān-e-yārāñ tere kūche kī havā ḳhuub sahī

zauq-e-jalvat meñ tab-o-tāb-e-haqīqat bhī to hai

shauq-e-ḳhalvat-kada-e-sāz-o-sadā ḳhuub sahī

din ko sahrā meñ bagūloñ kā safar bhī dekho

sub.h-dam baaġh meñ ye raqs-e-sabā ḳhuub sahī

sar-zamīneñ haiñ bahut ruuh ke pātāl meñ bhī

māh-o-mirrīḳh pe āvāz-e-darā ḳhuub sahī

dost zindān-e-anāsir se rihā.ī ma.alūm

dasht-e-imkān-e-taḳhayyul kī fazā ḳhuub sahī

vus.ateñ aur bahut haiñ ġham-e-daurāñ ke liye

qibla-e-jāñ ke liye qibla-numā ḳhuub sahī

ḳhūb-tar hai mirī taz.īn se har paikar-e-jāñ

terī taḳhlīq kā har naqsh-e-baqā ḳhuub sahī

paañv meñ apnā hī saaya hai pareshān 'jamīl'

sar pe dastār-e-par-o-bāl-e-humā ḳhuub sahī

jurm tera na sahi meri saza KHub sahi

aaina-KHana-e-hasti ki ada KHub sahi

pas se to teri aankhon ke bhanwar le Dube

dur se jalwa-e-girdab-e-bala KHub sahi

kaisa sawan hai ki jo khul ke barasta hi nahin

dekhne mein teri zulfon ki ghaTa KHub sahi

ghar mein jo baat hai wo tere shabistan mein kahan

jaan-e-yaran tere kuche ki hawa KHub sahi

zauq-e-jalwat mein tab-o-tab-e-haqiqat bhi to hai

shauq-e-KHalwat-kada-e-saz-o-sada KHub sahi

din ko sahra mein bagulon ka safar bhi dekho

subh-dam bagh mein ye raqs-e-saba KHub sahi

sar-zaminen hain bahut ruh ke patal mein bhi

mah-o-mirriKH pe aawaz-e-dara KHub sahi

dost zindan-e-anasir se rihai malum

dasht-e-imkan-e-taKHayyul ki faza KHub sahi

wusaten aur bahut hain gham-e-dauran ke liye

qibla-e-jaan ke liye qibla-numa KHub sahi

KHub-tar hai meri tazin se har paikar-e-jaan

teri taKHliq ka har naqsh-e-baqa KHub sahi

panw mein apna hi saya hai pareshan 'jamil'

sar pe dastar-e-par-o-baal-e-huma KHub sahi