jun fauj ki maftuh ho zanjir mein aawe

juuñ fauj ki maftūh ho zanjīr meñ aave

alfāz kā lashkar mirī tahrīr meñ aave

ik ḳhaas ināyat hai ki dete nahīñ mujh ko

vo dard ki jo panja-e-tadbīr meñ aave

yaksar rag-e-mansūr kī himmat se pare hai

vo ilm ki ik arsa-e-taqtīr meñ aave

jo chāhe bhare maiñ ne musavvir se kahā thā

kuchh rang-e-mohabbat mirī tasvīr meñ aave

vo baat ḳhushā detā hai dil jis kī gavāhī

ye kyā ki kaho aglī asātīr meñ aave

jo hukm tumhārā hai vo vājib hai bilā-shak

jo arz hamārī hai vo ta.azīr meñ aave

hai garche bahut mere liye ḳhvāb kī duniyā

kuchh aur maza ḳhvāb kī ta.abīr meñ aave

jis paas mudāvā nahīñ kuchh āb-o-havā kā

lāzim hai mire halqa-e-taqrīr meñ aave

mumkin nahīñ aadam ke liye shān-e-ḳhudā.ī

haañ yuuñ ki magar āya-e-tat.hīr meñ aave

jun fauj ki maftuh ho zanjir mein aawe

alfaz ka lashkar meri tahrir mein aawe

ek KHas inayat hai ki dete nahin mujh ko

wo dard ki jo panja-e-tadbir mein aawe

yaksar rag-e-mansur ki himmat se pare hai

wo ilm ki ek arsa-e-taqtir mein aawe

jo chahe bhare main ne musawwir se kaha tha

kuchh rang-e-mohabbat meri taswir mein aawe

wo baat KHusha deta hai dil jis ki gawahi

ye kya ki kaho agli asatir mein aawe

jo hukm tumhaara hai wo wajib hai bila-shak

jo arz hamari hai wo tazir mein aawe

hai garche bahut mere liye KHwab ki duniya

kuchh aur maza KHwab ki tabir mein aawe

jis pas mudawa nahin kuchh aab-o-hawa ka

lazim hai mere halqa-e-taqrir mein aawe

mumkin nahin aadam ke liye shan-e-KHudai

han yun ki magar aaya-e-tathir mein aawe