kaba bhi hai TuTa hua but-KHana hamara

ka.aba bhī hai TuuTā huā but-ḳhāna hamārā

yārab rahe ābād ye vīrāna hamārā

bātin kī tarah paak hai ḳhum-ḳhāna hamārā

kyuuñ kar na achhūtā rahe paimāna hamārā

jo sham.a huā kartī hai raushan sar-e-bāzār

us sham.a pe girtā nahīñ parvāna hamārā

saaqī tirā mai-ḳhāna rahe hashr tak ābād

bhar jaatā hai kashkol-e-gadāyāna hamārā

bah jā.egā is bazm meñ ik faiz kā dariyā

aatā hai chhalaktā huā paimāna hamārā

chal sū-e-adam chal hameñ kyā uzr hai ai maut

tayyār hai sāmān-e-ġharībāna hamārā

ban jaatā hai phir shaiḳh kā bhī murshid-e-kāmil

Dagtā nahīñ piitā hai jo paimāna hamārā

kis zulf ko suljhā.eñ raqībān-e-siyah-kār

chhūtā nahīñ is zulf ko phir shāna hamārā

fariyād-kunāñ haiñ kisī pāzeb ke daane

toḌe kahīñ zanjīr na dīvāna hamārā

ḳhāroñ se ye kah do ki gul-e-tar se na uljheñ

sīkhe koī andāz-e-sharīfāna hamārā

tāsīr na ho 'shād' to denā hameñ ilzām

kuchh der to sun vaa.iz hakīmāna hamārā

kaba bhi hai TuTa hua but-KHana hamara

yarab rahe aabaad ye virana hamara

baatin ki tarah pak hai KHum-KHana hamara

kyun kar na achhuta rahe paimana hamara

jo shama hua karti hai raushan sar-e-bazar

us shama pe girta nahin parwana hamara

saqi tera mai-KHana rahe hashr tak aabaad

bhar jata hai kashkol-e-gadayana hamara

bah jaega is bazm mein ek faiz ka dariya

aata hai chhalakta hua paimana hamara

chal su-e-adam chal hamein kya uzr hai ai maut

tayyar hai saman-e-gharibana hamara

ban jata hai phir shaiKH ka bhi murshid-e-kaamil

Dagta nahin pita hai jo paimana hamara

kis zulf ko suljhaen raqiban-e-siyah-kar

chhuta nahin is zulf ko phir shana hamara

fariyaad-kunan hain kisi pazeb ke dane

toDe kahin zanjir na diwana hamara

KHaron se ye kah do ki gul-e-tar se na uljhen

sikhe koi andaz-e-sharifana hamara

tasir na ho 'shad' to dena hamein ilzam

kuchh der to sun waiz hakimana hamara