kaba o dair mein jalwa nahin yaksan un ka

kaaba o dair meñ jalva nahīñ yaksāñ un kā

jo ye kahte haiñ TaTole koī īmāñ un kā

justujū ke liye niklegā jo ḳhvāhāñ un kā

ghar batā degā koī mard-e-musalmāñ un kā

tū ne dīdār kā jin jin se kiyā hai vaada

haa.e re un kī ḳhushī haa.e re armāñ un kā

apne miTne kā sabab maiñ bhī batā duuñ ai shauq

kaash chhū jaa.e mirī ḳhaak se dāmāñ un kā

chhoḌ kar aa.e haiñ jo sub.h-e-vatan sī shai ko

martaba kuchh to samajh shām-e-ġharībāñ un kā

jin kī āġhosh-e-tasavvur meñ hai vo huur jamāl

kahīñ sach ho na yahī ḳhvāb-e-pareshāñ un kā

jo is uljhāo ke ḳhud haiñ mutamannī dil se

kyā bigāḌegī tirī zulf-e-pareshāñ un kā

sar meñ saudā-e-ḳhirad paañv meñ zanjīr-e-shukūk

bhed pā.egā na is shakl se insāñ un kā

ham duā deñ tujhe dil khol ke ai pahlu-e-tañg

TuuT kar siine meñ rah jaa.e jo paikāñ un kā

chaak karne kā hai ilzām mire sar nāhaq

haath un ke haiñ ham un ke haiñ garebāñ un kā

vo miTā kyuuñ nahīñ dete mujhe hairat to ye hai

un ke kahne meñ hai dil dil meñ hai armāñ un kā

un shahīdān-e-mohabbat meñ to maiñ saaf kahūñ

koī itnā nahīñ pakḌe jo garebāñ un kā

vahī aise haiñ ki ḳhāmosh haiñ sab kī sun kar

sab ko daavā hai ki huuñ banda-e-farmāñ un kā

pahle ham nīyat-e-ḳhālis se vazū to kar leñ

Thahar ai ḳhaak Thahar paak hai dāmāñ un kā

chāheñ dozaḳh meñ utāreñ ki jagah ḳhuld meñ deñ

daḳhl kyā ġhair ko ghar un ke haiñ mehmāñ un kā

kahīñ paivand kī koshish kahīñ tadbīr-e-rafū

jāma-e-tan se bahut tañg hai uryāñ un kā

kījiye shāna o ā.īna kī hālat pe nigāh

sīna-sad-chāk koī hai koī hairāñ un kā

maan lo paañv se zanjīr bhī utrī lekin

bhaag kar jaa.e kahāñ qaidi-e-zindāñ un kā

jin shahīdoñ ne ba-sad-dard taḌap kar dī jaan

chhin gayā haath se jiitā huā maidāñ un kā

ham to kyā chiiz haiñ jibrīl to jā leñ un tak

rok letā hai farishtoñ ko bhī darbāñ un kā

mast jaate haiñ ḳharābāt se masjid kī taraf

raah pur-shor hai allāh nigah-bāñ un kā

ham shab-e-hijr ke jaage na qayāmat meñ uTheñ

jab talak ḳhvāb se chauñkā.e na armāñ un kā

vahm tū hī ḳhalal-andāz huā hai varna

kaun juuyā nahīñ ai rahzan-e-īmāñ un kā

din qayāmat kā Dhalā sab ne murādeñ pā.īñ

rah gayā dekh ke muñh tāba-e-farmāñ un kā

marne vāloñ kā agar saath diyā puurā kar

le janāza bhī uThā hasrat o armāñ un kā

haq jatāte haiñ shahīdān-e-mohabbat bekār

kyā ye marnā thā baḌā kār-e-numāyāñ un kā

'shād' ghabrā gayā ik umr se jiite jiite

vo bulā leñ mujhe is vaqt to ehsāñ un kā

kaba o dair mein jalwa nahin yaksan un ka

jo ye kahte hain TaTole koi iman un ka

justuju ke liye niklega jo KHwahan un ka

ghar bata dega koi mard-e-musalman un ka

tu ne didar ka jin jin se kiya hai wada

hae re un ki KHushi hae re arman un ka

apne miTne ka sabab main bhi bata dun ai shauq

kash chhu jae meri KHak se daman un ka

chhoD kar aae hain jo subh-e-watan si shai ko

martaba kuchh to samajh sham-e-ghariban un ka

jin ki aaghosh-e-tasawwur mein hai wo hur jamal

kahin sach ho na yahi KHwab-e-pareshan un ka

jo is uljhao ke KHud hain mutamanni dil se

kya bigaDegi teri zulf-e-pareshan un ka

sar mein sauda-e-KHirad panw mein zanjir-e-shukuk

bhed paega na is shakl se insan un ka

hum dua den tujhe dil khol ke ai pahlu-e-tang

TuT kar sine mein rah jae jo paikan un ka

chaak karne ka hai ilzam mere sar nahaq

hath un ke hain hum un ke hain gareban un ka

wo miTa kyun nahin dete mujhe hairat to ye hai

un ke kahne mein hai dil dil mein hai arman un ka

un shahidan-e-mohabbat mein to main saf kahun

koi itna nahin pakDe jo gareban un ka

wahi aise hain ki KHamosh hain sab ki sun kar

sab ko dawa hai ki hun banda-e-farman un ka

pahle hum niyat-e-KHalis se wazu to kar len

Thahar ai KHak Thahar pak hai daman un ka

chahen dozaKH mein utaren ki jagah KHuld mein den

daKHl kya ghair ko ghar un ke hain mehman un ka

kahin paiwand ki koshish kahin tadbir-e-rafu

jama-e-tan se bahut tang hai uryan un ka

kijiye shana o aaina ki haalat pe nigah

sina-sad-chaak koi hai koi hairan un ka

man lo panw se zanjir bhi utri lekin

bhag kar jae kahan qaidi-e-zindan un ka

jin shahidon ne ba-sad-dard taDap kar di jaan

chhin gaya hath se jita hua maidan un ka

hum to kya chiz hain jibril to ja len un tak

rok leta hai farishton ko bhi darban un ka

mast jate hain KHarabaat se masjid ki taraf

rah pur-shor hai allah nigah-ban un ka

hum shab-e-hijr ke jage na qayamat mein uThen

jab talak KHwab se chaunkae na arman un ka

wahm tu hi KHalal-andaz hua hai warna

kaun juya nahin ai rahzan-e-iman un ka

din qayamat ka Dhala sab ne muraden pain

rah gaya dekh ke munh taba-e-farman un ka

marne walon ka agar sath diya pura kar

le janaza bhi uTha hasrat o arman un ka

haq jatate hain shahidan-e-mohabbat bekar

kya ye marna tha baDa kar-e-numayan un ka

'shad' ghabra gaya ek umr se jite jite

wo bula len mujhe is waqt to ehsan un ka