kabe mein jaan-ba-lab the hum duri-e-butan se

ka.abe meñ jāñ-ba-lab the ham dūrī-e-butāñ se

aa.e haiñ phir ke yaaro ab ke ḳhudā ke haañ se

tasvīr ke se taa.ir ḳhāmosh rahte haiñ ham

jī kuchh uchaT gayā hai ab naala o fuġhāñ se

jab kaundtī hai bijlī tab jānib-e-gulistāñ

rakhtī hai chheḌ mere ḳhāshāk-e-āshiyāñ se

kyā ḳhūbī us ke muñh kī ai ġhuncha naql kariye

tū to na bol zālim bū aatī hai vahāñ se

āñkhoñ hī meñ rahe ho dil se nahīñ ga.e ho

hairān huuñ ye shoḳhī aa.ī tumheñ kahāñ se

sabzān-e-bāġh saare dekhe hue haiñ apne

dilchasp kaahe ko haiñ us bevafā javāñ se

kī shust-o-shobadan kī jis din bahut sī un ne

dho.e the haath maiñ ne us din hī apnī jaañ se

ḳhāmoshī hī meñ ham ne dekhī hai maslahat ab

har yak se haal dil kā muddat kahā zabāñ se

itnī bhī bad-mizājī har lahza 'mīr' tum ko

uljhāv hai zamīñ se jhagḌā hai āsmāñ se

kabe mein jaan-ba-lab the hum duri-e-butan se

aae hain phir ke yaro ab ke KHuda ke han se

taswir ke se tair KHamosh rahte hain hum

ji kuchh uchaT gaya hai ab nala o fughan se

jab kaundti hai bijli tab jaanib-e-gulistan

rakhti hai chheD mere KHashak-e-ashiyan se

kya KHubi us ke munh ki ai ghuncha naql kariye

tu to na bol zalim bu aati hai wahan se

aankhon hi mein rahe ho dil se nahin gae ho

hairan hun ye shoKHi aai tumhein kahan se

sabzan-e-bagh sare dekhe hue hain apne

dilchasp kahe ko hain us bewafa jawan se

ki shust-o-shobadan ki jis din bahut si un ne

dhoe the hath main ne us din hi apni jaan se

KHamoshi hi mein hum ne dekhi hai maslahat ab

har yak se haal dil ka muddat kaha zaban se

itni bhi bad-mizaji har lahza 'mir' tum ko

uljhaw hai zamin se jhagDa hai aasman se