kafir-e-ishq ko kya se kya kar diya

kāfir-e-ishq ko kyā se kyā kar diyā

but ne haq āshnā āshnā kar diyā

koī dekhe haqīqat mire kufr kī

maiñ ne jis but ko puujā ḳhudā kar diyā

pārsā.ī dharī rah ga.ī shaiḳh kī

chashm-e-jādū-asar tū ne kyā kar diyā

dekhne vaale ka.aba samajhne lage

kitnā raushan tirā naqsh-e-pā kar diyā

but-parastī meñ kī maiñ ne vo bandagī

but-kade ko bhī qibla-numā kar diyā

ai fanā merī mayyat pe kahte haiñ vo

aap ne apnā va.ada vafā kar diyā

kafir-e-ishq ko kya se kya kar diya

but ne haq aashna aashna kar diya

koi dekhe haqiqat mere kufr ki

main ne jis but ko puja KHuda kar diya

parsai dhari rah gai shaiKH ki

chashm-e-jadu-asar tu ne kya kar diya

dekhne wale kaba samajhne lage

kitna raushan tera naqsh-e-pa kar diya

but-parasti mein ki main ne wo bandagi

but-kade ko bhi qibla-numa kar diya

ai fana meri mayyat pe kahte hain wo

aap ne apna wada wafa kar diya