kaghaz ki naw kya hui dariya kidhar gaya

kāġhaz kī naav kyā huī dariyā kidhar gayā

bachpan ko jo milā thā vo lamha kidhar gayā

ma.adūm sab huiiñ vo tajassus kī bijliyāñ

hairat meñ Daal de vo tamāshā kidhar gayā

phir yuuñ huā ki log mashīnoñ meñ Dhal ga.e

vo dost lab pe le ke dilāsa kidhar gayā

kyā dasht-e-jāñ kī soḳhta-hālī kaheñ ise

chāhat meñ chāñd chhūne kā jazba kidhar gayā

tārīkiyāñ haiñ saath mire aur safar mudām

kal tak thā ham-qadam jo farishta kidhar gayā

jo rahnumā the mere kahāñ haiñ vo naqsh-e-pā

manzil pe chhoḌtā thā jo rasta kidhar gayā

kaghaz ki naw kya hui dariya kidhar gaya

bachpan ko jo mila tha wo lamha kidhar gaya

madum sab huin wo tajassus ki bijliyan

hairat mein Dal de wo tamasha kidhar gaya

phir yun hua ki log mashinon mein Dhal gae

wo dost lab pe le ke dilasa kidhar gaya

kya dasht-e-jaan ki soKHta-haali kahen ise

chahat mein chand chhune ka jazba kidhar gaya

tarikiyan hain sath mere aur safar mudam

kal tak tha ham-qadam jo farishta kidhar gaya

jo rahnuma the mere kahan hain wo naqsh-e-pa

manzil pe chhoDta tha jo rasta kidhar gaya