kakul-o-chashm-o-lab-o-ruKHsar ki baaten karo

kākul-o-chashm-o-lab-o-ruḳhsār kī bāteñ karo

zulmat-e-daurāñ meñ husn-e-yār kī bāteñ karo

kaun kyuuñ le kar chalā aatā hai un kā qāfila

āñso.oñ ke qāfila-e-sālār kī bāteñ karo

koī chāhe yā na chāhe ye safar hai nā-guzīr

kārvān-e-vaqt kī raftār kī bāteñ karo

ḳhanjaro kuchh to sar-e-maqtal pe ho.e tabsira

āriyo kaaTe ga.e ashjār kī bāteñ karo

kyā nahīñ mumkin ki ho hālāt pahle kī tarah

kyā zarūrī hai ki tum pindār kī bāteñ karo

vā.izo ab ke sharāb-e-ishq par taqrīr ho

mai-kashoñ allāh ke dīdār kī bāteñ karo

be-qarārī kā sabab banñe lagī dānishvarī

ab sukūñ darkār hai be-kār kī bāteñ karo

kakul-o-chashm-o-lab-o-ruKHsar ki baaten karo

zulmat-e-dauran mein husn-e-yar ki baaten karo

kaun kyun le kar chala aata hai un ka qafila

aansoon ke qafila-e-salar ki baaten karo

koi chahe ya na chahe ye safar hai na-guzir

karwan-e-waqt ki raftar ki baaten karo

KHanjaro kuchh to sar-e-maqtal pe hoe tabsira

aariyo kaTe gae ashjar ki baaten karo

kya nahin mumkin ki ho haalat pahle ki tarah

kya zaruri hai ki tum pindar ki baaten karo

waizo ab ke sharab-e-ishq par taqrir ho

mai-kashon allah ke didar ki baaten karo

be-qarari ka sabab banne lagi danishwari

ab sukun darkar hai be-kar ki baaten karo