kali ghaTa kab aaegi fasl-e-bahaar mein

kaalī ghaTā kab aa.egī fasl-e-bahār meñ

āñkheñ safed ho ga.iiñ is intizār meñ

kyuuñ kar qarār aa.e dil-e-be-qarār meñ

tum puure kab utarte ho qaul-o-qarār meñ

tārīk dasht ho gayā āñkhoñ meñ qais kī

pinhāñ huā jo nāqa-e-lailā ġhubār meñ

aa.e kabhī na phir tujhe sair-e-chaman meñ lutf

baiThe agar tū aa ke dil-e-dāġh-dār meñ

lāzim nahīñ ki mard musībat meñ ho malūl

ḳhandāñ hamesha rahtā hai gul ḳhārzār meñ

hai ye kisī kī chashm-e-siyah-mast kā asar

tauba bhī laḌkhaḌāne lagī hai bahār meñ

hote vahāñ jo 'dāġh' to dillī bhī dekhte

ab kyā kareñge jā ke us ujḌe dayār meñ

kyā ḳhaak apne dil ko tamannā-e-sher ho

juz ḳhaar kuchh nahīñ chaman-e-rozgār meñ

juz 'dāġh' aaj bulbul-e-hindustāñ hai kaun

kahte haiñ ham pukār ke ye sau hazār meñ

ai 'mashriqī' nasīb na sū-e-duā hai ye

kyā ġham jo jāgtā huuñ shab-e-intizār meñ

kali ghaTa kab aaegi fasl-e-bahaar mein

aankhen safed ho gain is intizar mein

kyun kar qarar aae dil-e-be-qarar mein

tum pure kab utarte ho qaul-o-qarar mein

tarik dasht ho gaya aankhon mein qais ki

pinhan hua jo naqa-e-laila ghubar mein

aae kabhi na phir tujhe sair-e-chaman mein lutf

baiThe agar tu aa ke dil-e-dagh-dar mein

lazim nahin ki mard musibat mein ho malul

KHandan hamesha rahta hai gul KHarzar mein

hai ye kisi ki chashm-e-siyah-mast ka asar

tauba bhi laDkhaDane lagi hai bahaar mein

hote wahan jo 'dagh' to dilli bhi dekhte

ab kya karenge ja ke us ujDe dayar mein

kya KHak apne dil ko tamanna-e-sher ho

juz KHar kuchh nahin chaman-e-rozgar mein

juz 'dagh' aaj bulbul-e-hindustan hai kaun

kahte hain hum pukar ke ye sau hazar mein

ai 'mashriqi' nasib na su-e-dua hai ye

kya gham jo jagta hun shab-e-intizar mein