kali raaton ko bhi rangin kaha hai maine

kaalī rātoñ ko bhī rañgīn kahā hai maiñ ne

terī har baat pe āmīn kahā hai maiñ ne

terī dastār pe tanqīd kī himmat to nahīñ

apnī pā-posh ko qālīn kahā hai maiñ ne

maslahat kahiye use yā ki siyāsat kahiye

chiil kavvoñ ko bhī shāhīn kahā hai maiñ ne

zā.iqe bārhā āñkhoñ meñ mazā dete haiñ

ba.az chehroñ ko bhī namkīn kahā hai maiñ ne

tū ne fan kī nahīñ shajre kī himāyat kī hai

tere e.azāz ko tauhīn kahā hai maiñ ne

kali raaton ko bhi rangin kaha hai main ne

teri har baat pe aamin kaha hai main ne

teri dastar pe tanqid ki himmat to nahin

apni pa-posh ko qalin kaha hai main ne

maslahat kahiye use ya ki siyasat kahiye

chil kawwon ko bhi shahin kaha hai main ne

zaiqe barha aankhon mein maza dete hain

baz chehron ko bhi namkin kaha hai main ne

tu ne fan ki nahin shajre ki himayat ki hai

tere eazaz ko tauhin kaha hai main ne