kaam himmat se jawan mard agar leta hai

kaam himmat se javāñ mard agar letā hai

saañp ko maar ke ganjīna-e-zar letā hai

nā-gavārā ko jo kartā hai gavārā insāñ

zahr pī kar maza-e-shīr-o-shakar letā hai

haale meñ maah kā hotā hai chakoroñ ko yaqīñ

kabhī añgḌā.ī jo vo rashk-e-qamar letā hai

vo zubūñ-baḳht shajar huuñ maiñ ki dahqāñ merā

pīchhe botā hai mujhe pahle tabar letā hai

manzil-e-faqr-o-fanā jā-e-adab hai ġhāfil

bādshah taḳht se yaañ apne utar letā hai

ganj-e-pinhāñ haiñ tasarruf meñ banī-ādam ke

kaan se laal ye dariyā se guhar letā hai

nazar aa jaatā hai ai gul jise ruḳhsār tirā

phūloñ se dāman-e-nazzāra vo bhar letā hai

aql kar detī hai insāñ kī jahālat zaa.il

maut se jaan chhupāne ko sipar letā hai

yaad rakhtā hai adam meñ koī sāġhar-kash use

hichkiyāñ shīsha-e-mai shām-o-sahar letā hai

ġhairat-e-nāla-o-fariyād na kho ai 'ātish'

āshnā koī nahīñ kaun ḳhabar letā hai

kaam himmat se jawan mard agar leta hai

sanp ko mar ke ganjina-e-zar leta hai

na-gawara ko jo karta hai gawara insan

zahr pi kar maza-e-shir-o-shakar leta hai

haale mein mah ka hota hai chakoron ko yaqin

kabhi angDai jo wo rashk-e-qamar leta hai

wo zubun-baKHt shajar hun main ki dahqan mera

pichhe bota hai mujhe pahle tabar leta hai

manzil-e-faqr-o-fana ja-e-adab hai ghafil

baadshah taKHt se yan apne utar leta hai

ganj-e-pinhan hain tasarruf mein bani-adam ke

kan se lal ye dariya se guhar leta hai

nazar aa jata hai ai gul jise ruKHsar tera

phulon se daman-e-nazzara wo bhar leta hai

aql kar deti hai insan ki jahaalat zail

maut se jaan chhupane ko sipar leta hai

yaad rakhta hai adam mein koi saghar-kash use

hichkiyan shisha-e-mai sham-o-sahar leta hai

ghairat-e-nala-o-fariyaad na kho ai 'atish'

aashna koi nahin kaun KHabar leta hai