kaam ishq-e-be-sawal aa hi gaya

kaam ishq-e-be-savāl aa hī gayā

ḳhud-ba-ḳhud us ko ḳhayāl aa hī gayā

tū ne pherī laakh narmī se nazar

dil ke ā.īne meñ baal aa hī gayā

do mirī gustāḳh nazroñ ko sazā

phir vo nā-gufta savāl aa hī gayā

zindagī se laḌ na paayā josh-e-dil

rafta rafta e'tidāl aa hī gayā

husn kī ḳhalvat meñ darrātā huā

ishq kī dekho majāl aa hī gayā

ġham bhī hai ik parda-e-iz.hār-e-shauq

chhup ke aañsū meñ savāl aa hī gayā

vo ufuq par aa gayā mehr-e-shabāb

zindagī kā māh-o-sāl aa hī gayā

be-ḳhudī meñ kah chalā thā rāz-e-dil

vo to kahiye kuchh ḳhayāl aa hī gayā

ham na kar paa.e ḳhatā buzdil zamīr

le ke tasvīr-e-ma.āl aa hī gayā

ibtidā-e-ishq ko samjhe the khel

marne jiine kā savāl aa hī gayā

laakh chāhā ham na leñ ġham kā asar

ruḳh pe ik rañg-e-malāl aa hī gayā

bach ke jāoge kahāñ 'mullā' koī

haath meñ le kar gulāl aa hī gayā

kaam ishq-e-be-sawal aa hi gaya

KHud-ba-KHud us ko KHayal aa hi gaya

tu ne pheri lakh narmi se nazar

dil ke aaine mein baal aa hi gaya

do meri gustaKH nazron ko saza

phir wo na-gufta sawal aa hi gaya

zindagi se laD na paya josh-e-dil

rafta rafta e'tidal aa hi gaya

husn ki KHalwat mein darraata hua

ishq ki dekho majal aa hi gaya

gham bhi hai ek parda-e-izhaar-e-shauq

chhup ke aansu mein sawal aa hi gaya

wo ufuq par aa gaya mehr-e-shabab

zindagi ka mah-o-sal aa hi gaya

be-KHudi mein kah chala tha raaz-e-dil

wo to kahiye kuchh KHayal aa hi gaya

hum na kar pae KHata buzdil zamir

le ke taswir-e-maal aa hi gaya

ibtida-e-ishq ko samjhe the khel

marne jine ka sawal aa hi gaya

lakh chaha hum na len gham ka asar

ruKH pe ek rang-e-malal aa hi gaya

bach ke jaoge kahan 'mulla' koi

hath mein le kar gulal aa hi gaya