kaam ka ek yahi kaam kiya

kaam kā ek yahī kaam kiyā

ishq-dar-ishq sub.h-o-shām kiyā

dil javāban dhaḌak rahā thā mirā

tū ne āñkhoñ se jab salām kiyā

mujh ko tujh se baḌī mohabbat hai

le ye dil maiñ ne tere naam kiyā

bai.at-e-ishq toḌ dī us ne

jis ne duniyā kā ehtirām kiyā

tab samajh aayā ḳhāl-o-ḳhad kā kalām

tujh se jab rū-ba-rū kalām kiyā

merī bad-nāmiyoñ se pūchh tujhe

kitnī mushkil se nek-nām kiyā

ham payambar haiñ husn-e-jānāñ ke

is sharī.at ko ham ne aam kiyā

dard ke ab vahāñ ḳhazāne haiñ

maiñ ne 'ḳhālid' jahāñ qiyām kiyā

kaam ka ek yahi kaam kiya

ishq-dar-ishq subh-o-sham kiya

dil jawaban dhaDak raha tha mera

tu ne aankhon se jab salam kiya

mujh ko tujh se baDi mohabbat hai

le ye dil main ne tere nam kiya

baiat-e-ishq toD di us ne

jis ne duniya ka ehtiram kiya

tab samajh aaya KHal-o-KHad ka kalam

tujh se jab ru-ba-ru kalam kiya

meri bad-namiyon se puchh tujhe

kitni mushkil se nek-nam kiya

hum payambar hain husn-e-jaanan ke

is shariat ko hum ne aam kiya

dard ke ab wahan KHazane hain

main ne 'KHalid' jahan qiyam kiya