kaam ki baat maine ki hi nahin

kaam kī baat maiñ ne kī hī nahīñ

ye mirā taur-e-zindagī hī nahīñ

ai umiid ai umīd-e-nau-maidāñ

mujh se mayyat tirī uThī hī nahīñ

maiñ jo thā us galī kā mast-e-ḳhirām

us galī meñ mirī chalī hī nahīñ

ye sunā hai ki mere kuuch ke ba.ad

us kī ḳhushbū kahīñ basī hī nahīñ

thī jo ik fāḳhta udaas udaas

sub.h vo shāḳh se uḌī hī nahīñ

mujh meñ ab merā jī nahīñ lagtā

aur sitam ye ki merā jī hī nahīñ

vo jo rahtī thī dil-mohalle meñ

phir vo laḌkī mujhe milī hī nahīñ

jā.iye aur ḳhaak uḌā.iye aap

ab vo ghar kyā ki vo galī hī nahīñ

haa.e vo shauq jo nahīñ thā kabhī

haa.e vo zindagī jo thī hī nahīñ

kaam ki baat main ne ki hi nahin

ye mera taur-e-zindagi hi nahin

ai umid ai umid-e-nau-maidan

mujh se mayyat teri uThi hi nahin

main jo tha us gali ka mast-e-KHiram

us gali mein meri chali hi nahin

ye suna hai ki mere kuch ke baad

us ki KHushbu kahin basi hi nahin

thi jo ek faKHta udas udas

subh wo shaKH se uDi hi nahin

mujh mein ab mera ji nahin lagta

aur sitam ye ki mera ji hi nahin

wo jo rahti thi dil-mohalle mein

phir wo laDki mujhe mili hi nahin

jaiye aur KHak uDaiye aap

ab wo ghar kya ki wo gali hi nahin

hae wo shauq jo nahin tha kabhi

hae wo zindagi jo thi hi nahin