kan mein nala-e-hazar aaya

kaan meñ nāla-e-hazār aaya

muzhda-e-mausam-e-bahār aaya

kyā ḳhayāl-e-sharāb-ḳhvār aaya

barq sā abr be-qarār aaya

bāġh-e-ālam meñ thā maiñ naḳhl-e-sham.a

jal gayā gul na barg-o-bār aaya

dekh shatranj-e-dahr kī raftār

ki piyāda gayā savār aaya

mar ga.e par bhī shauq-e-vasl rahā

ḳhvāb meñ bhī ḳhayāl-e-yār aaya

shīsha-e-sā.at ik ghaḌī meñ banā

dil meñ jis dam zarā ġhubār aaya

yaar jab ġhair ke gale se milā

yaad kyā sadma-e-fishār aaya

pāk-tīnat vo thā ki parvāna

sham.a ban kar sar-e-mazār aaya

shab ko ai gul jo ġhair se tū hañsā

mujh ko ronā hazār baar aaya

baḳhsh de ab to ai ḳhudā-e-karīm

dil-e-māyūs umīd-vār aaya

ik nazar 'arsh' sair-e-hastī kar

kaun jā kar adam se yaar aaya

kan mein nala-e-hazar aaya

muzhda-e-mausam-e-bahaar aaya

kya KHayal-e-sharab-KHwar aaya

barq sa abr be-qarar aaya

bagh-e-alam mein tha main naKHl-e-shama

jal gaya gul na barg-o-bar aaya

dekh shatranj-e-dahr ki raftar

ki piyaada gaya sawar aaya

mar gae par bhi shauq-e-wasl raha

KHwab mein bhi KHayal-e-yar aaya

shisha-e-saat ek ghaDi mein bana

dil mein jis dam zara ghubar aaya

yar jab ghair ke gale se mila

yaad kya sadma-e-fishaar aaya

pak-tinat wo tha ki parwana

shama ban kar sar-e-mazar aaya

shab ko ai gul jo ghair se tu hansa

mujh ko rona hazar bar aaya

baKHsh de ab to ai KHuda-e-karim

dil-e-mayus umid-war aaya

ek nazar 'arsh' sair-e-hasti kar

kaun ja kar adam se yar aaya