kanTe hon ya phul akele chunna hoga

kāñTe hoñ yā phuul akele chunñā hogā

ham jaisā mohtāt hamesha tanhā hogā

fikr o taraddud meñ har dam kyā ghulte rahnā

hogā to bas vo hī jo kuchh honā hogā

us se kyā kahnā hai pahle ye to tai ho

phir socheñge kyā anjām hamārā hogā

jin meñ kho kar ham ḳhud ko bhī bhuul ga.e haiñ

kyā ham ko bhī un āñkhoñ ne DhūñDā hogā

pathrīlī dhartī hai ankur kyā phūTeñge

be-shak bādal TuuT ke in par barsā hogā

teshe aur junūñ kī bāteñ bas bāteñ haiñ

kaun bhalā martā hai kaun divāna hogā

merī tarah TuuTe ā.īne meñ us ne bhī

TukḌe TukḌe apne aap ko paayā hogā

terī to 'bilqīs' nirālī hī bāteñ haiñ

is duniyā meñ kaise tirā guzārā hogā

kanTe hon ya phul akele chunna hoga

hum jaisa mohtat hamesha tanha hoga

fikr o taraddud mein har dam kya ghulte rahna

hoga to bas wo hi jo kuchh hona hoga

us se kya kahna hai pahle ye to tai ho

phir sochenge kya anjam hamara hoga

jin mein kho kar hum KHud ko bhi bhul gae hain

kya hum ko bhi un aankhon ne DhunDa hoga

pathrili dharti hai ankur kya phuTenge

be-shak baadal TuT ke in par barsa hoga

teshe aur junun ki baaten bas baaten hain

kaun bhala marta hai kaun diwana hoga

meri tarah TuTe aaine mein us ne bhi

TukDe TukDe apne aap ko paya hoga

teri to 'bilqis' nirali hi baaten hain

is duniya mein kaise tera guzara hoga