kanTon mein hi kuchh zarf-e-samaat nazar aae

kāñToñ meñ hī kuchh zarf-e-samā.at nazar aa.e

gulshan meñ kahīñ to merī rūdād sunī jaa.e

is kārgah-e-shīsha meñ ā.īna huuñ maiñ bhī

chehra nahīñ koī to koī sañg hī aa.e

gul-gasht kā ab zauq na kuchh qadr-e-bahārāñ

ik umr se huuñ zaḳhmoñ kā gulzār sajā.e

manzil kā hai imkāñ na koī ḳhatm-e-safar kā

is ābla-pā.ī ko koī naam diyā jaa.e

is vādī-e-kohsār meñ patthar hī nahīñ haiñ

hai aur bahut kuchh bhī kisī ko to nazar aa.e

haañ tez bahut tez hai ab vaqt kī raftār

is dil kā karūñ kyā ki jo chal paa.e na ruk paa.e

tāñbe sī zamīñ aur sivā neze pe sūraj

taqdīr ne yuuñ hashr ke āsār dikhā.e

ik gard-e-masāfat thī jo chehre se na utrī

vaise to yahāñ ham ne ka.ī shahr basā.e

'imdād'-nizāmī na suḳhnavar the na shā.er

kuchh zaḳhm amānat the kisī kī vahī le aa.e

kanTon mein hi kuchh zarf-e-samaat nazar aae

gulshan mein kahin to meri rudad suni jae

is kargah-e-shisha mein aaina hun main bhi

chehra nahin koi to koi sang hi aae

gul-gasht ka ab zauq na kuchh qadr-e-bahaaran

ek umr se hun zaKHmon ka gulzar sajae

manzil ka hai imkan na koi KHatm-e-safar ka

is aabla-pai ko koi nam diya jae

is wadi-e-kohsar mein patthar hi nahin hain

hai aur bahut kuchh bhi kisi ko to nazar aae

han tez bahut tez hai ab waqt ki raftar

is dil ka karun kya ki jo chal pae na ruk pae

tanbe si zamin aur siwa neze pe suraj

taqdir ne yun hashr ke aasar dikhae

ek gard-e-masafat thi jo chehre se na utri

waise to yahan hum ne kai shahr basae

'imdad'-nizami na suKHnawar the na shaer

kuchh zaKHm amanat the kisi ki wahi le aae