kar-e-afzaish-e-anwar-e-sahar kis ne kiya

kār-e-afzā.ish-e-anvār-e-sahar kis ne kiyā

sirf āfāq mirā raḳht-e-safar kis ne kiyā

be-hunar tujh se mirā ijz-e-hunar pūchhtā hai

mujh ko ma.atūb sar-e-shahr-e-hunar kis ne kiyā

dahr-e-fānī meñ faqat ahl-e-qanā.at ke sivā

zindagī tujh ko bahar-hāl basar kis ne kiyā

ai mire jazb-e-anā terī baqā kī ḳhātir

apnī takmīl se is taur hazar kis ne kiyā

tū ki ik zarra-e-nāchīz thā ai husn-ma.āb

tujh ko ham-pāya-e-ḳhurshīd-o-qamar kis ne kiyā

aaj bhī dañg hai raftār-e-zamāna is par

ek pal meñ ka.ī qarnoñ kā safar kis ne kiyā

sochtā huuñ faqat is daur ke insāñ ke liye

hasrat-o-yās ke mausam ko amar kis ne kiyā

mahv-e-hairat hai tahayyur bhī jahāñ par 'tābish'

aise be-āb-o-giyah dasht ko ghar kis ne kiyā

kar-e-afzaish-e-anwar-e-sahar kis ne kiya

sirf aafaq mera raKHt-e-safar kis ne kiya

be-hunar tujh se mera ijz-e-hunar puchhta hai

mujh ko matub sar-e-shahr-e-hunar kis ne kiya

dahr-e-fani mein faqat ahl-e-qanaat ke siwa

zindagi tujh ko bahar-haal basar kis ne kiya

ai mere jazb-e-ana teri baqa ki KHatir

apni takmil se is taur hazar kis ne kiya

tu ki ek zarra-e-nachiz tha ai husn-maab

tujh ko ham-paya-e-KHurshid-o-qamar kis ne kiya

aaj bhi dang hai raftar-e-zamana is par

ek pal mein kai qarnon ka safar kis ne kiya

sochta hun faqat is daur ke insan ke liye

hasrat-o-yas ke mausam ko amar kis ne kiya

mahw-e-hairat hai tahayyur bhi jahan par 'tabish'

aise be-ab-o-giyah dasht ko ghar kis ne kiya