kar-gah-e-hasti mein lala dagh-saman hai

kār-gāh-e-hastī meñ laala dāġh-sāmāñ hai

barq-e-ḳhirman-e-rāhat ḳhūn-e-garm-e-dahqāñ hai

ġhuncha tā shaguftan-hā barg-e-āfiyat mā'lūm

bā-vajūd-e-dil-jam.ī ḳhvāb-e-gul pareshāñ hai

ham se ranj-e-betābī kis tarah uThāyā jaa.e

daaġh pusht-e-dast-e-ijz sho'la ḳhas-ba-dandāñ hai

'ishq ke taġhāful se harzah-gard hai 'ālam

rū-e-shash-jihat-āfāq pusht-e-chashm-e-zindāñ hai

hairat tapīdan-hā ḳhuuñ bahā-e-dīdan-hā

rañg-e-gul ke parde meñ ā.īna pur-afshāñ hai

vahshat-e-anjuman hai gul dekh laale kā 'ālam

misl-e-dūd mujmir ke daaġh baal afshāñ hai

ai karam na ho ġhāfil varna hai 'asad' be-dil

be-guhar sadaf goyā pusht-e-chashm-e-naisāñ hai

kar-gah-e-hasti mein lala dagh-saman hai

barq-e-KHirman-e-rahat KHun-e-garm-e-dahqan hai

ghuncha ta shaguftan-ha barg-e-afiyat ma'lum

ba-wajud-e-dil-jami KHwab-e-gul pareshan hai

hum se ranj-e-betabi kis tarah uThaya jae

dagh pusht-e-dast-e-ijz sho'la KHas-ba-dandan hai

'ishq ke taghaful se harzah-gard hai 'alam

ru-e-shash-jihat-afaq pusht-e-chashm-e-zindan hai

hairat tapidan-ha KHun baha-e-didan-ha

rang-e-gul ke parde mein aaina pur-afshan hai

wahshat-e-anjuman hai gul dekh lale ka 'alam

misl-e-dud mujmir ke dagh baal afshan hai

ai karam na ho ghafil warna hai 'asad' be-dil

be-guhar sadaf goya pusht-e-chashm-e-naisan hai