karwan luT gaya rahbar chhuT gaya raat tarik hai gham ka yara nahin

kārvāñ luT gayā rāhbar chhuT gayā raat tārīk hai ġham kā yaarā nahīñ

raah meñ bhī koī sham' jaltī nahīñ āsmāñ par bhī koī sitārā nahīñ

ye bahār-o-ḳhizāñ ye ḳhushī aur ġham ye hasīñ nāznīñ dil ke patthar sanam

sab sahāre haiñ bas chaar din ke liye zindagī-bhar kā koī sahārā nahīñ

merī ġhairat mirī aan kā imtihāñ terī sāzish pe bhārī hai ai bāġhbāñ

jaan de duuñ abhī ye to manzūr hai gulsitāñ chhoḌ duuñ ye gavārā nahīñ

ghaT ga.ī yā to zauq-e-safar kī lagan baḌh ga.ī yā na.ī laġhzishoñ se thakan

koī to baat hai jo sar-e-rah-guzar aaj manzil ne ham ko pukārā nahīñ

tum ho muḳhtār ye dil kī āvāz hai āḳhir is baat meñ kaun sā raaz hai

jis ko nisbat tumhāre hī dar se rahī vo muqaddar bhī tum ne sañvārā nahīñ

is se baḌh kar koī aur kaise jiye 'umr-bhar ham ne ik bevafā ke liye

kaun sī raat āñkhoñ meñ kaaTī nahīñ kaun sā din taḌap kar guzārā nahīñ

raas aa.e jise us ko āsān hai 'ishq kī varna har mauj tūfān hai

ai 'sabā' ek dariyā hai ye aag kā vo bhī aisā ki jis kā kinārā nahīñ

karwan luT gaya rahbar chhuT gaya raat tarik hai gham ka yara nahin

rah mein bhi koi sham' jalti nahin aasman par bhi koi sitara nahin

ye bahaar-o-KHizan ye KHushi aur gham ye hasin naznin dil ke patthar sanam

sab sahaare hain bas chaar din ke liye zindagi-bhar ka koi sahaara nahin

meri ghairat meri aan ka imtihan teri sazish pe bhaari hai ai baghban

jaan de dun abhi ye to manzur hai gulsitan chhoD dun ye gawara nahin

ghaT gai ya to zauq-e-safar ki lagan baDh gai ya nai laghzishon se thakan

koi to baat hai jo sar-e-rah-guzar aaj manzil ne hum ko pukara nahin

tum ho muKHtar ye dil ki aawaz hai aaKHir is baat mein kaun sa raaz hai

jis ko nisbat tumhaare hi dar se rahi wo muqaddar bhi tum ne sanwara nahin

is se baDh kar koi aur kaise jiye 'umr-bhar hum ne ek bewafa ke liye

kaun si raat aankhon mein kaTi nahin kaun sa din taDap kar guzara nahin

ras aae jise us ko aasan hai 'ishq ki warna har mauj tufan hai

ai 'saba' ek dariya hai ye aag ka wo bhi aisa ki jis ka kinara nahin