kash uThin hum bhi gunahgaron ke bich

kaash uThīñ ham bhī gunahgāroñ ke biich

huuñ jo rahmat ke sazā-vāroñ ke biich

jī sadā un abrūoñ hī meñ rahā

kī basar ham-umr talvāroñ ke biich

chashm ho to ā.ina-ḳhāna hai dahr

muñh nazar aatā hai dīvāroñ ke biich

haiñ 'anāsir kī ye sūrat-bāziyāñ

sho'bade kyā kyā haiñ un chāroñ ke biich

jab se le niklā hai to ye jins-e-husn

paḌ ga.ī hai dhuum bāzāroñ ke biich

āshikī-o-be-kasī-o-raftagī

jī rahā kab aise āzāroñ ke biich

jo sarishk us maah bin jhamke hai shab

vo chamak kaahe ko hai tāroñ ke biich

us ke ātishnāk ruḳhsāroñ baġhair

loTiye yuuñ kab tak añgāroñ ke biich

baiThnā ġhairoñ meñ kab hai nañg-e-yār

phuul gul hote hī haiñ ḳhāroñ ke biich

yaaro mat us kā fareb-e-mehr khaao

'mīr' bhī the us ke hī yāroñ ke biich

kash uThin hum bhi gunahgaron ke bich

hun jo rahmat ke saza-waron ke bich

ji sada un abruon hi mein raha

ki basar ham-umr talwaron ke bich

chashm ho to aaina-KHana hai dahr

munh nazar aata hai diwaron ke bich

hain 'anasir ki ye surat-baziyan

sho'bade kya kya hain un chaaron ke bich

jab se le nikla hai to ye jins-e-husn

paD gai hai dhum bazaron ke bich

aashiki-o-be-kasi-o-raftagi

ji raha kab aise aazaron ke bich

jo sarishk us mah bin jhamke hai shab

wo chamak kahe ko hai taron ke bich

us ke aatishnak ruKHsaron baghair

loTiye yun kab tak angaron ke bich

baiThna ghairon mein kab hai nang-e-yar

phul gul hote hi hain KHaron ke bich

yaro mat us ka fareb-e-mehr khao

'mir' bhi the us ke hi yaron ke bich