kash uThin hum bhi gunahgaron ke beach

kaash uThīñ ham bhī gunahgāroñ ke beach

huuñ jo rahmat ke sazā-vāroñ ke beach

jī sadā un abrūoñ hī meñ rahā

kī basar ham-umr talvāroñ ke beach

chashm ho to ā.īna-ḳhāna hai dahr

muñh nazar aatā hai dīvāroñ ke beach

haiñ anāsir kī ye sūrat-bāziyāñ

sho.abde kyā kyā haiñ un chāroñ ke beach

jab se le niklā hai to ye jins-e-husn

paḌ ga.ī hai dhuum bāzāroñ ke beach

āshikī-o-be-kasī-o-raftagī

jī rahā kab aise āzāroñ ke beach

jo sarishk us maah bin jhamke hai shab

vo chamak kaahe ko hai tāroñ ke beach

us ke ātishnāk ruḳhsāroñ baġhair

loTiye yuuñ kab tak añgāroñ ke beach

baiThnā ġhairoñ meñ kab hai nañg-e-yār

phuul gul hote hī haiñ ḳhāroñ ke beach

yaaro mat us kā fareb-e-mehr khaao

'mīr' bhī the us ke hī yāroñ ke beach

kash uThin hum bhi gunahgaron ke beach

hun jo rahmat ke saza-waron ke beach

ji sada un abruon hi mein raha

ki basar ham-umr talwaron ke beach

chashm ho to aaina-KHana hai dahr

munh nazar aata hai diwaron ke beach

hain anasir ki ye surat-baziyan

shoabde kya kya hain un chaaron ke beach

jab se le nikla hai to ye jins-e-husn

paD gai hai dhum bazaron ke beach

aashiki-o-be-kasi-o-raftagi

ji raha kab aise aazaron ke beach

jo sarishk us mah bin jhamke hai shab

wo chamak kahe ko hai taron ke beach

us ke aatishnak ruKHsaron baghair

loTiye yun kab tak angaron ke beach

baiThna ghairon mein kab hai nang-e-yar

phul gul hote hi hain KHaron ke beach

yaro mat us ka fareb-e-mehr khao

'mir' bhi the us ke hi yaron ke beach