kab diya ye jala hawa ke liye

kab diyā ye jalā havā ke liye

'ishq hotā nahīñ fanā ke liye

yaad mujh ko na aa ḳhudā kī tarah

ab mujhe baḳhsh de ḳhudā ke liye

aaj dekhā shahāb-e-sāqib to

haath phailā diye du'ā ke liye

maiñ ne pūchhā ki zindagī kyoñ hai

hañs ke bolā tirī sazā ke liye

ek lamhe ko jo amaañ de de

kitnā tarse haiñ us ridā ke liye

dil se koī sadā nahīñ ubhrī

jab se bichhḌā hai vo sadā ke liye

maar detī hai jaan se ham ko

phir bhī marte haiñ ham anā ke liye

apne ḳhuuñ se diyā jalāyā hai

maiñ ne is sar-phirī havā ke liye

ruuh ko bhī asiir kar Daalā

ham ne sayyād kī razā ke liye

kaun un ko miTā sakā hai 'sabīn'

miT ga.e haiñ jo karbalā ke liye

kab diya ye jala hawa ke liye

'ishq hota nahin fana ke liye

yaad mujh ko na aa KHuda ki tarah

ab mujhe baKHsh de KHuda ke liye

aaj dekha shahab-e-saqib to

hath phaila diye du'a ke liye

main ne puchha ki zindagi kyon hai

hans ke bola teri saza ke liye

ek lamhe ko jo aman de de

kitna tarse hain us rida ke liye

dil se koi sada nahin ubhri

jab se bichhDa hai wo sada ke liye

mar deti hai jaan se hum ko

phir bhi marte hain hum ana ke liye

apne KHun se diya jalaya hai

main ne is sar-phiri hawa ke liye

ruh ko bhi asir kar Dala

hum ne sayyaad ki raza ke liye

kaun un ko miTa saka hai 'sabin'

miT gae hain jo karbala ke liye