kab is zamin pe mujhe aarmida hona tha

kab is zamīñ pe mujhe ārmīda honā thā

havā se ḳhaak ko barsoñ parīda honā thā

agar thī dāman-e-jānāñ kī aarzū ai dil

to chand dam ke liye āb-dīda honā thā

kisī ke chehre pe hotā kisī ke dāman meñ

mujhe bhī aañkh kā ashk-e-chakīda honā thā

kabhī na ḳhidmat-e-dāman se sarfarāz huā

vo haath huuñ ki jise nā-rasīda honā thā

kamāl-e-be-adabī se ye arz karte haiñ

hamīñ se a qad-e-jānāñ kashīda honā thā

agar thī lazzat-e-pāmāl kī havas ai dil

ba-shakl-e-sabza zamīñ par damīda honā thā

ajab na thā ki use rahm kuchh na kuchh aatā

merī umiid tujhe abr-dīda honā thā

kamāl-e-rabt meñ hotī haiñ saikaḌoñ bāteñ

na is qadar tumheñ ham se kashīda honā thā

tirā jamāl banā maiñ kabhī, kabhī ehsāñ

ġharaz ye thī ki mujhe barguzīda honā thā

khulī ab aañkh to kyā fā.eda 'nasīm' afsos

na samjhe zer-e-lahad ārmīda honā thā

kab is zamin pe mujhe aarmida hona tha

hawa se KHak ko barson parida hona tha

agar thi daman-e-jaanan ki aarzu ai dil

to chand dam ke liye aab-dida hona tha

kisi ke chehre pe hota kisi ke daman mein

mujhe bhi aankh ka ashk-e-chakida hona tha

kabhi na KHidmat-e-daman se sarfaraaz hua

wo hath hun ki jise na-rasida hona tha

kamal-e-be-adabi se ye arz karte hain

hamin se a qad-e-jaanan kashida hona tha

agar thi lazzat-e-pamal ki hawas ai dil

ba-shakl-e-sabza zamin par damida hona tha

ajab na tha ki use rahm kuchh na kuchh aata

meri umid tujhe abr-dida hona tha

kamal-e-rabt mein hoti hain saikaDon baaten

na is qadar tumhein hum se kashida hona tha

tera jamal bana main kabhi, kabhi ehsan

gharaz ye thi ki mujhe barguzida hona tha

khuli ab aankh to kya faeda 'nasim' afsos

na samjhe zer-e-lahad aarmida hona tha