kab nuqsan uThaya humne

kab nuqsān uThāyā ham ne

'ishq meñ aap kamāyā ham ne

sunñe vaale 'ujlat meñ the

qisse ko nipTāyā ham ne

dhuup kī abjad raTte-raTte

bāñch liyā ik saaya ham ne

ḳhvāb nahīñ haiñ ye kāñTe haiñ

āñkhoñ ko samjhāyā ham ne

ham bāshinde ham hī baanī

tanhā shahr basāyā ham ne

vahshat ke kaale jaadū se

sub.h ko shaam banāyā ham ne

bhūlā-bisrā aabī naġhma

sahrā-sahrā gaayā ham ne

kab nuqsan uThaya hum ne

'ishq mein aap kamaya hum ne

sunne wale 'ujlat mein the

qisse ko nipTaya hum ne

dhup ki abjad raTte-raTte

banch liya ek saya hum ne

KHwab nahin hain ye kanTe hain

aankhon ko samjhaya hum ne

hum bashinde hum hi bani

tanha shahr basaya hum ne

wahshat ke kale jadu se

subh ko sham banaya hum ne

bhula-bisra aabi naghma

sahra-sahra gaya hum ne